سفاح Scream
انا طول عمري من وانا طفل صغير
وانا بحب جدا سلسلة افلام Scream
كنت دايما بشوف انها سلسة افلام مسلية
برغم ان اغلب الناس .. كانت بتخاف منها
لكن كل ده كان لحد الحادثة المرعبة
اللي حصلتلي من شهرين
و اللي خلتني واثق و متأكد اني عمري ف حياتي
م حتفرج عليها مرة تانية
فاليوم ده
انا و سلمى خطيبتي
كنا خارجين رايحين السينما
الجو فاليوم ده كان جميل جدا
و كنا مشغلين مزيكا عالية
بصراحة .. كانت ليلة متتنسيش
و لما وصلنا المكان .. ركنت العربية
و اخدت ايد سلمى و نزلنا مالعربية
و مشينا فالممر لحد م دخلنا جوه السينما
و كنا رايحين مخصوص عشان نتفرج على فيلم رعب Scream طبعا
وقتها الانوار اتطفت
و الناس كلها قعدت ف اماكنها
لكن فجأة
سلمى مسكت ايدي جامد و قالتلي
سلمى : مازن .. فيه واحد لابس ماسك Scream قاعد ورانا
انا : متبقيش جبانة كده يا سلمى..انتى اكيد خايفة مالفيلم بس و اكيد مش عايزانا نقوم نمشي يعني ؟!
سلمى : انا بتكلم بجد .. فيه واحد لابس ماسك Scream قاعد وراك علطول يا مازن .. بص وراك .. بسرعة
انا : انسي يا سلمى .. مش حتعرفي تخدعيني
سلمى : مش حعرف فعلا ..
بعدها سلمى ابتدت تضحك
و ابتدت تستسلم لفكرة انها تخليني ابص ورايا
لكن اول مالفيلم بدأ
مكنتش قادر اقاوم فكرة اني ابص ورايا
عشان اشوف الشخص اللي سلمى قالتلي عليه
و بمجرد م لفيت و بصيت ورايا
اتصدمت ماللي شوفته
ف اخر صف ف قاعة السينما
كان فيه شخص لابس لبس Scream
و كان ماسك ف ايده .. سكينة كبيرة و حادة
وقتها حسيت ب تنميل ف جسمي كله بمجرد م شوفت منظره
كان بيبصلنا احنا بالتحديد .. و بيضحك ضحكة مرعبة
ووقتها
حاولت اني ابينله اني مش خايف .. و ابتديت اضحك انا كمان
بعدها بصيت ل سلمي و قلتلها بصوت واطي
انا : هو ده بقى يا سلمى اللي انتي خايفة منه
ده اكيد بس شخص مهووس ب شخصية الفيلم
سلمى : شخص مهووس !
انا : ايوه .. ده مجرد شخص عادي بس لابس لبس Scream
و شكله مفيش منه اي خطر يعني
لكن فجأة
سمعنا صوت صرخة مرعبة
جاية مالكرسي اللي ورانا
و أول م بصينا
شوفنا جثة مرمية عالارض و غرقانة ف دمها
و كان واقف جمبها
الراجل اللي كان لابس لبس Scream
و السكينة بتاعته .. كانت غرقانة دم
وقتها قمت بسرعة من مكاني و مسكت ايد سلمى
وابتدينا نجري ف اتجاه باب الخروج
لكننا اول م وصلنا هناك
الباب كان مقفول
ابتدينا نخبط عالباب واحنا بنصرخ
على امل ان حد يجي و يلحقنا
لكن كل اللي كنا سامعينه وقتها
كانت اصوات صريخ جاية من برة
و فجأة
الباب اتفتح
لكن اللي كان وراه
مكنش شخص جي عشان يساعدنا
كان شخص تاني لابس نفس لبس Scream
وقتها طلعنا نجري بسرعة عالسلالم
لحد م وصلنا لأوضة العرض
سلمى : هو ايه اللي بيحصل بجد يا مازن ؟!
انا : مش عارف يا سلمى
تعالي بس ساعديني اننا نحط الكرسي ده قدام الباب
كنا سامعين اصوات خبط عالية جدا على باب الاوضة
لحد م فجأة
الراجل كسر الباب و دخلنا
و ف اقل من ثانية
شوفت سكينة حادة طايرة فالهوا
لحد م دخلت ف رقبة سلمى
وقتها طلعت اجري على سلمى
وانا بصرخ و بعيط مالمنظر اللي شوفته
لكن قبل محاول اني اعمل اي حاجة
كان فيه سكينة تانية جاية ف اتجاهي
لكنى وقتها
قدرت اني اتفاداها
وعطلول طلعت اجري ناحية الشباك
عشان انط واهرب مالمكان
و كنت شايف حواليا موجود جثث كتير .. مرمية عالارض
لكن وقتها .. كان لازم اني اهرب
و اول م وصلت للعربية .. علطول دورتها
و طلعت اجري لحد م وصلت لاقرب قسم شرطة
و حكتلهم على كل اللي حصل
بعدها الشرطة اتجهت علطول للمكان
لكنهم اول م وصلوا هناك
المكان كان فاضي تماما
باستثناء الجثث اللي كانت موجودة عالارض
واللي كانت سلمى من ضمنهم
الظابط : تعالا معانا عالقسم
فيه شوية أسئلة محتاجينك تجاوب عليها
انا : نعم ! .. أسئلة ايه ؟!
انتوا عايزيني اقولكم ايه تاني ؟!
الظابط : احنا بس عايزين نتأكد ان انت مكنش عندك اي دافع للي حصل .. ليك الحق انك تفضل ساكت فالمحضر
و بعدها .. خدوني معاهم
لكنهم بعد متأكدوا .. اني مش انا اللي عملت الجريمة دي
سمحولي اني امشي من قسم الشرطة
وقتها اخدت العربية و مشيت مالمكان
و كنت حاسس بألم شديد و صدمة جامدة
كل م بفتكر صورة سلمى قدامي
لكن اثناء م كنت سايق و متجه للبيت
اكتشفت ان فيه طريقة .. لحل اللغز ده
كاميرات المراقبة
ايوه .. لو القاتل ده كان ظاهر ف تسجيلات المراقبة
اكيد حيقدروا انهم يوصلوله و يقبضوا عليه
انا : ايوه .. صح كده
انا حجبكم .. انا حنتقم منكم
وقتها قلبى ابتدى ينبض بسرعة بسبب الحماس اللي كنت فيه
لكن ف ثواني
كل الحماس ده اتحول ل رعب لما فجأة
شفت ف المراية .. عربية مريبة كانت ماشية ورايا
وقتها ابتديت ادوس بنزين اكتر عشان احاول اني اهرب منهم
و كنت على وشك اني اهرب فعلا لما فجأة
حسيت ب خبطة جامدة فالعربية من ورا
ووقتها عرفت
ان مفيش فايدة من كل اللي انا بعمله
و انهم اكيد حيمسكوني
عشان كده وقتها
سبت العربية و نزلت اجري
لكني اثناء م كنت بجري .. اتزحلقت ووقعت عالارض
و ف اقل من ثانية
شفت القاتل المرعب ده بيقرب مني .. و هو ماسك سكينة كبيرة
ووقتها
عرفت ان دي النهاية
لكن فجأة و ف وسط الصمت ده
سمعت صوت سرينة الشرطة
الظابط : ارمي السلاح
وقتها الراجل طلع يجري بسرعة عشان يحاول انه يهرب
لكن لحسن الحظ
الظابط كان اسرع منه
و قدروا انهم يمسكوه .. و يقبضوا عليه
اكيد الشرطة كانت عارفة ان القاتل ده حيجيلي
عشان يخلص باقي المهمة
و يمكن ده كان هو السبب ف اني لسه عايش
لحد النهارده
لكني لحد اللحظة دي
لسه فيه شئ تاعبني جدا
و مش عارف هل فعلا حقدر اني اتخطاه .. ولا لأ ؟!
الراجل اللي مسكوه كان شخص مريض
قاتل متسلسل كان متأثر ب سلسلة افلام Scream
و كان بيرتكب جرايم كتير باللبس ده
سلمى و كل الناس اللي اتقتلت فاليوم ده
كانوا ضحايا بسبب شخص مريض و مجنون
كان عايز بس انه يشبع رغبته فالقتل
انا بجد عمري م حفكر مرة تانية
اني اتفرج على فيلم Scream
لكن ده
مش هو الشئ الوحيد اللي تاعبني
لأن الشئ التاني .. مخيف اكتر و اكتر
الشرطة نجحت بالفعل ف انها تقبض عالمجرم السفاح ده
لكن اللي كانوا فالسينما ليلتها .. كانوا اتنين مش شخص واحد
و لو القاتل ده وقتها
كان عايز فعلا يخلص مهمته
طيب بالنسبة للقاتل التاني ؟!
كل الافكار المخيفة دي بقت شاغلة كل تفكيري
لدرجة اني بقيت عايش ف حالة قلق و رعب
بسبب فكرة ان المجرم التاني ده
ممكن يكون فعلا بيراقبني
و مستني اي فرصة تانية
عشان يخلص المهمة ..
تعليقات
إرسال تعليق