البيت المسكون
تخيل انك تصحى ف يوم تبقى حد تاني
محدش عارفك و كله خايف منك
وانت حتى مش قادر انك تتكلم او تشرح اللي فيك
و فجأة تختفى عن الواقع .. و الناس تبتدى انها تنساك
ف تقرر انك تظهر تاني
عشان تحكيلهم حكايتك بنفسك ...
انا طول عمرى بحب السفر واني الف العالم ..
لان التواصل مع ناس جديدة ب ثقافات مختلفة
ده اكبر شغف بالنسبالي ..
المرادي كنت مسافر بلد جديدة ..
كنت ماشي على الطريق السريع
و الدنيا كانت بتشتي جامد لما شفت يافطة كبيرة
بتدل ان ده مدخل المدينة ..
كنت مبسوط اني اخيرا حقدر الاقي مكان ابات فيه الليلادى..
فضلت سايق فالمدينة و كان حواليا بيوت كتير لحد ما فيه بيت لفت انتباهي.
البيت كان شكله مهجور ..
و كان مكتوب كلام كتير على الجدران بتاعته ..
المطر كان ابتدى يقل شوية عشان كده وقفت بالعربية عند البيت و نزلت عشان اقرا الكلام ..
شغلت فلاش الموبايل و ابتديت أقرا ..
ابعد .. جحيم .. متحاولش ترجع.. ( بصوت مرعب )..
الكلام كان مكتوب ف كل مكان ..
و ف اثناء منا بفكر يا ترى ايه اللي موجود جوه البيت ده بصيت عالشباك اللي فوق و فجأة ..
شفت ولد واقف عند الشباك..
كان وشه باهت و عينه حمرا كأنه منمش من سنين..
و فضل باصصلي بصة غريبة ..
انت محتاج مساعدة ؟؟
الولد منطقش و فضل واقف نفس الوقفة عشان كده سألته تاني
ااا انت كويس ؟!
بس المرادي الولد ابتسم ابتسامة مخيفة
و فجأة .. هااا ( صوت خضة )
التفت بسرعة لقيت راجل عجوز شكله غريب واقف ورايا و ماسك فانوس ف ايده..
و كان باين على وشه انه مستغرب انا ازاي واقف قدام البيت المهجور ده..
انا : انت خضتني !!
الراجل : انت مين ؟
انا : انا كنت مسافر و جيت ادور على مكان ابات فيه لحد الصبح
الراجل : ممممم ... بس انت مينفعش تدخل البيت ده
انا : هاا .. لا لا لا لا انا مكنتش بفكر ف كده .. انا بس كنت ببص عالبيت ف شفت الولد اللي فالشباك
الراجل : ولد ؟!! ولد مين ؟!
انا : الولد اللي كان واقف بيضحكلي فالشباك
ممكن يكون محتاج مساعدتنا !
الراجل : مفيش حد ساكن فالبيت ده اصلا .. انت اكيد بيتهألك
انا : لكن انا شفته فعلا .. كان واقف هناك عند الشباك..
الراجل : اقرب اوتيل على بعد ساعة من هنا .. انا عندي اوضة للضيوف .. لو حابب.. تقدر تيجي تبات عندي لحد الصبح ..
و اول مخلص كلامه ابتدى يديني ضهره و مشي..
بالرغم من ان طريقة الراجل ده كانت غريبة شوية .. بس مكنش قدامي حل تاني غير اني اقبل دعوته..
كان من الصعب عليا اني احاول اصدق ان الولد اللي انا شفته فالبيت المهجور ده كان من وحى خيالي..
بس مش عارف ليه كنت حاسس ان الراجل العجوز ده يعرف حاجات كتير مش عايز يقولهالي ..
البيت بتاعه كان شكله قديم جدا من جوه
كأنه عايش فالعصر الحجري ..
قعدنا جمب الدفاية و اداني حاجة عشان اشربها ..
فالوقت ده بصلي و قاللي
الراجل : مفيش اكل فالبيت دلوقتي لان بسبب سوء الجو اليومين اللي فاتوا مكنتش بطلع مالبيت
انا : مفيش مشكلة .. انا مش جعان للدرجة
ابتدى يبصلي و هو بيهز الكرسي اللي كان قاعد عليه
فالوقت ده بصتله و سألته
انا : هو ايه اللي حصل فالبيت ده ؟!!
بصلي باستغراب كأني سألت سؤال غريب و قاللي
الراجل : عايز تعرف ايه اللي حصل ؟!
انا : اكيد
فالوقت ده بص على النار اللي كانت فالدفاية و ابتدى انه يحكي القصة ...
القصة ابتدت من سنين لما جيت اعيش هنا مع ابويا .. كان بيشتغل مزارع ..
كان في اطفال كتير فالحي بتاعنا .. لحد ما جه سامي
و بقى هو اقرب صديق ليا ..
سامي كان عايش فالبيت ده مع اهله .. عيلته كانت كبيرة و كانوا علطول عاملين دوشة .. لكن كانوا سعدا
كنت بحب اقضي اغلب الوقت ف بيت سامي
عمته كانت دايما بتديني حلويات كل مروحلهم ..
انا مش فاكر اسمها .. بس سامي كان بيحبها جدا
و ف يوم.. عمته ماتت .. انا و ابويا حضرنا الجنازة
كل الموجودين كانوا بيعيطوا عليها ..
ما عدا سامي
مكنش بيعيط .. حتى منطقش بكلمة
كلنا كنا فاكرين ان هو حيبقى اكتر شخص متأثر بوفاة عمته لانه كان اقرب حد ليها ..
انا لسه فاكر شكل سامي لما شاف منظر عمته و هي فالتابوت..
و من يومها سامي اتغير
مكنش بيخرج ابدا و كان دايما ف اوضته مع لوح الويجا
كان بيقول ان عمته علمته ازاي يستخدمه ..
بس بعد م عمته ماتت
حاجات كتير غريبة ابتدت تحصل فالبيت ده
العيلة كانت بتسمع اصوات عالية و اصوات خربشة ف كل مكان
فالبداية .. مامت سامي كانت حاسة ان الاصوات دي مرتبطة بموت عمته
و ف يوم سامي قاللي انه بيسمع بليل صوت حد ماشي ف اوضته
فاليوم التاني مامته ابتدت تلاحظ اثار خربشة على السرير بتاعه
بعد كده ابتدت تظهر على جسمه
كان بيصحى اوقات كتير بليل و يقعد يصرخ
و ساعات كان بيقعد يضحك بجنون
انا مش ناسي اللي قالهولي اخر مرة زرته فيها
انا : قالك ايه ؟
الراجل : انا بشوفهم
كلهم بيتجمعوا بليل حوالين السرير بتاعي و بيفضلوا يبصولي
و هما بيصرخوا صرخات مكتومة
كلنا كنا حاسين ان سامي فيه حاجة
كلنا كنا حاسين ان فيه شئ اتمكن منه
بس محدش كان قادر يوقفه او يساعده
اهله ابتدوا يجبوله أشخاص عشان يعملوله جلسات طرد ارواح
كانوا بيحاولوا انهم يخرجوا منه اي روح شريرة
لكن كل مرة
كان السرير بتاعه بيبتدى يتهز جامد و عينه كانت بتتحرك فوق و تحت بسرعة كأنها حتخرج من مكانها
كان بيتصرف كأنه حيوان متوحش كل محد يقرب منه
و العفش كله كان بيطير فالهوا
و كل الموجودين بيطلعوا يجروا مالخوف ..
حاولوا انهم يكرروا الجلسات اكتر من مرة
و ف كل مرة سامي كان بيبتدى انه يرجع و يعمل على نفسه او حتى يتف عليهم و يتكلم بلغة غريبة
و كان بيضحك ضحكة مرعبة كأنه شيطان
و اثناء جلسة مالجلسات الشخص اللي كان معاه ابتدى انه يقرب منه
و برغم ان سامي كان متكتف فالسرير ب سلاسل ..
الا انه عرف يفك ايده و كسر السرير و مسك ايه الراجل و خلعها من مكانها ..
و طبعا ده خلى الجلسة تقف ..
انا : ايه الرعب ده ؟!!
الراجل: فالليلة دي ابتدت تظهر كلمة على جسم سامي كأن شخص مجهول نحتها على جسمه بسكينة حادة
انا : كلمة ايه ؟!
الراجل : جحيم .. عذاب
كنت حاسس اني ابتديت اعرق مالرعب وانا قاعد بسمع قصة البيت المسكون ده ..
فالوقت ده الراجل ابتدى انه يشرب المشروب بتاعه قبل ميكمل
فالليلة الاخيرة كان فيه ٣ أشخاص موجودين فالجلسة
و قالوا ان جسم سامى ابتدا انه يطير فالهوا ..
انا : معنى كده انه خف ؟!!
الراجل : ده اللي كنا كلنا فاكرينه
بعدها عيلته سابت البيت ده خالص و محدش شاف سامي من بعدها ..
انا: ليه راح فين ؟
فجأة الراجل ابتدي انه يبص عالشباك
كان الشتا وقف.. و كان شكله.. كأنه مستنى يسمع حاجة
بعدها قاللي
الراجل: لو سألتني
سامي لسه فالبيت ده
هو مخرجش منه ابدا
لأنه مخفش
انا : تقصد ايه ؟!!
الراجل : مش انت قلت انك شفت ولد كان بيضحكلك فالشباك؟!!
هو ده سامي !
انا : لكن انت قلتلي انه كان صاحبك زمان..
يعني المفروض دلوقتي يكون ف سنك !
الولد اللي انا شفته كان شكله صغير
الراجل : مظبوط
فالوقت ده ايديا ابتدت تترعش ..
و جسمي ابتدا ان كله ينمل مالخوف ..
الراجل ابتدا انه يقوم من مكانه
و قام مشاورلي عالاوضة اللي حنام فيها
و قاللي
الراجل : تقدر انك تنام هنا
و ابعد عن البيت المهجور ده
و ابتدا انه يطلع على اوضته وانا دخلت الاوضة عشان انام
بس طبعا معرفتش انام الليلة دي
كنت مستني الصبح يطلع باي طريقة
عدى ٣ سنين على زيارتي للمكان ده
بس ف كل مرة بقعد افكر ايه اللي ممكن يكون حصل ل سامي
بلاقي نفسي مش قادر اتخيل الاجابة
معرفش اللي قالهولي الراجل العجوز فالليلة دي كان صح ولا لأ
بس كل اللي انا متأكد منه
ان الولد اللي انا شفته ده مكنش حقيقى
مش ممكن سامي يكون كان مريض و الناس كلها كانت فاكرة انه ملبوس ؟!!
مش ممكن تكون الجلسات دي كلها كانت غلط و هو مات بسببها ؟!!
كل الاستنتاجات دي بتأكد ليه محدش شاف سامي من وقتها
كمان بتوضح الولد الصغير اللي انا شفته ليلتها فالبيت المهجور
تصدق او لأ .. انا متأكد ان سامي مات موتة غريبة
و سبب ان روحه قررت انها تسكن البيت
هو ان الناس لسه متعرفش قصته ولا ايه اللي حصل معاه ليلتها !
ف قرر انه يحكيهالهم ب نفسه !
اشترك في قناتنا عاليوتيوب
تابعنا على صفحتنا عالفيسبوك
اشترك في جروب الفيسبوك
تابعنا على صفحتنا عالانستاجرام
تابعنا على قناتنا عالتيك توك
تابعنا على صفحتنا على تويتر
تعليقات
إرسال تعليق