التوأم القاتل
حتعمل ايه لو فجأة
اكتشفت ان ليك توأم كان مختفي من سنين و مش موجود
و بعد اكتر من ٢٠ سنة
قرر انه يظهر بس
عشان ينتقم منك و ينهى حياتك
قصتنا النهارده هي قصة حقيقية
حصلت ليلة الكريسماس ٢٠٢٠
و الاحداث اللي حصلت ليلتها
مستحيل ان حد يصدقها
بطلة القصة دي اسمها مريم عندها ٢٧ سنة
عندها كلب بتحبه جدا ... مسمياه روكسي
و كان عندها اصحاب من الجامعة
كانوا اقرب اتنين ليها
سارة و ادهم
فالوقت اللي مريم اتخرجت فيه مالجامعة
كان لازم انها تنزل تشتغل
عشان تقدر تجيب مصروف تقدر تصرف بيه على نفسها
و بعدها علطول قدرت انها تلاقي شغل كويس
كانت بتشتغل ف كوفي شوب
سارة صحبتها كانت بتشتغل معاها
الفترة دي مامت مريم كانت بتتصرف تصرفات غريبة
كانت كل شوية بتتصل بيها و هي فالشغل عشان تتطمن عليها
مامتها كانت بتقلق من اقل حاجة
عشان كده مريم طلبت منها انها متتصلش تاني كل شوية
عشان تقدر تركز ف شغلها
كان فاضل ٥ ايام على ليلة الكريسماس
و كان فيه شغل كتير فالمكان
كمان كانوا ابتدوا انهم يجهزوا ديكورات الكريسماس
مريم كانت مستنية اليوم ده بفارغ الصبر
مش بس لانه يوم الكريسماس
كمان عشان ٢٥ ديسمبر
ده يبقى عيد ميلادها
عشان كده هي كانت متحمسة جدا لليوم ده
الساعة كانت ١٠ بليل
و كان ده الوقت اللي بيقفلوا فيه الكوفي شوب
فالوقت ده دخلت بنت عالكونتر
بصت لمريم و قالتلها
البنت : ازيك يا مريم .. ممكن اطلب كباية قهوة .. بس بسرعة من فضلك ؟!!
وقتها مريم كانت مستغربة هي مين دي و ازاي عرفت اسمها !
مريم : اكيد طبعا .. دقيقتين و الاوردر يكون جاهز
مريم : بس .. هو انتي ازاي عرفتي اسمي ؟!
البنت : من سارة .. سمعتها بتقول اسمك كتير
مريم كانت متفاجئة لانها مشافتش البنت دي قبل كده فالكوفي شوب ... ازاي كانت كمان عارفة اسم سارة !!!
وأول م مريم لفت عشان تسألها
كانت البنت اختفت !
مريم : سارة .. فين البنت اللي كانت هنا .. اللي طلبت قهوة؟!
سارة : بنت ! بنت ايه اللي بتتكلمي عنها
سارة : مفيش بنت جت اصلا
سارة : اخر اوردر كان ولد فالعشرينات اخد قهوة و مشى
وقتها مريم كانت متفاجئة .. هل كل دي كانت تهيؤات ؟!!
مريم كان معاها مفتاح تاني غير المفتاح اللي مع مامتها
عشان كده الليلة دي روحت و فتحت الباب
من غير متقول لمامتها انها وصلت
واول م دخلت الاوضة .. كانت مامتها ماسكة صور قديمة بتتفرج عليها
لكنها اتخضت جامد و ابتدت تعرق اول م شافت مريم دخلت
وعلطول قامت و شالت الصور دي فالدولاب و قفلت عليها.
مامت مريم : ااا انتي جيتي يا حبيبتي ..
مقولتليش انك جاية دلوقتي يعني
ااا يلا عشان نلحق نتعشى
فالوقت ده روكسي الكلب بتاعها كان بيهوهو جامد باستمرار
بس مريم مكنتش عارفه ماله
كمان هي كانت راجعة تعبانة جدا و مرهقة مالشغل
عشان كده محاولتش تركز ف ده و قررت انها تروح تاكل
و لما الساعة جت ٣ الفجر
مريم صحت فجأة مالنوم و فتحت عينيها
كانت حاسة انها تعبانة و جسمها مكسر
و فضلت تفكر فالبنت اللي شافتها الليلة دي فالكوفي شوب
يا ترى مين البنت دي ؟!!
فالوقت ده قامت عشان تدخل الحمام
واول م دخلت
شافت ضل مرسوم وراها ف مراية الحمام
كانت مرعوبة ماللي شافته فالمراية
قربت وشها اكتر عشان تتأكده ماللي شافته
ووقتها شافت ان الضل المرسوم فالمراية هو نسخة منها
نفس الوش
نفس الشعر
نفس الطول
كل حاجة كانت نسخة من مريم
ابتدت النسخة اللي فالمراية تغني
ووقتها مريم اتفجأت
انها نفس الاغنية اللي كانت ماماتها بتغنيهالها
لما كانت صغيرة قبل متنام
و اثناء مالنسخة اللي فالمراية كانت بتغني الاغنية
مريم مكنتش عارفة هي ايه اللي حصلها
مكنتش ف وعيها
و كانت حاسة انها مش مركزة و مش قادرة تتحرك
كأن الصوت ده خلاها تتجمد ف مكانها
و أول م فاقت مالصوت و استعادت وعيها
قررت انها تجري بسرعة و تخرج مالحمام
و فجأة
ظهرت ايد كبيرة و مرعبة و كان كلها دم
و خرجت من مراية الحمام و شدت شعرها بقوة
وقتها مريم مكنتش قادرة تتكلم او تصرخ
مكنتش قادرة تطلع اي صوت من بقها
حتى مقدرتش انها تنادي على مامتها
مريم لما بتفتكر الليلة المرعبة دي
بتحس بخوف شديد كأنها مش قادرة تاخد نفسها
فاليوم التاني مامتها صحت لقتها واقعة فالحمام و مغمى عليها
وقتها خدتها و جرت بيها عند الدكتور
و فاليوم ده مريم مراحتش الشغل
و من بعد الليلة دي
كل حاجة ابتدت تتغير
مريم كانت بتشوف وش البنت اللي قابلتها فالشغل ف كل مكان
كانت بتشوفها فالحمام
واوقات فالشغل عند الكونتر
لدرجة انها كانت ساعات بتشوفها ف وشوش اصحابها
و كانت وصلت لدرجة الجنون ماللي كان بيحصلها
بس كانت بتحاول انها تعدي كل ده
لحد م جت ليلة الكريسماس
ووقتها كل شئ
اتحول للاسوأ
فاليوم اللي قبل الكريسماس
مريم لقت تحت المخدة بتاعة مامتها
الصور اللي كانت بتخبيها منها
كانت صور طفولتها و هي صغيرة
و كان فيه بنت فالصور معاها واقفة جمبها
بس كان حد مشخبط على وشها عشان ميظهرش
لما جت ليلة الكريسماس اللي كانت كمان عيد ميلاد مريم
مريم عزمت اصحابها سارة و ادهم عالحفلة
و مامتها عزمت شخص قريبها اسمه هاني
كان بيجلهم زمان لما مريم كانت طفلة
و كانت مامتها دايما بتستشيره لما يكون فيه مشكلة
بس مريم مكنتش فاهمة ليه مامتها عزمته فاليوم ده بالذات
ابتدت الحفلة و مريم كانت فرحانة بعيد ميلادها
سارة :كل سنة وانتي طيبة يا مريم .. و ميري كريسماس
مريم : و انتي كمان يا سارة .. متشكرة اوي
كانوا مبسوطين جدا فالحفلة
و مريم كانت بتفتح الهدايا اللي جاتلها
لما فجأة روكسي ابتدا انه يهوهو تاني بصوت عالي
و بعدها علطول
مريم حست انها دايخة و راحت واقعة عالارض
و بعد شوية ابتدت انها تفوق و مكنتش فاكرة انها اغمى عليها
بس لقت نفسها ماسكة سكينة كبيرة
و هدومها كانت كلها دم
بصت على ايديها و هدومها ووقتها كانت مرعوبة مالمنظر
ابتدت تشك انها شكلها عملت مصيبة كبيرة
بس مكنتش فاكرة اي حاجة ماللي حصل
بصت على كل الموجودين ووقتها شافت رعب مرسوم على وشوهم و كانوا كلهم خايفين منها
واول م بصت عالارض
لقت سارة واقعة و غرقانة ف دمها
مريم قتلت سارة بدون قصد
ضربتها اكتر من ضربة بالسكينة لحد م ماتت
وقتها مريم ابتدت تعيط و هي بتنادي على سارة
مريم : سارة ... لا يا سارة عشان خطري
مامتها قالتلها انها مكنتش ف وعيها لما ده حصل
و ابتدت تقول بصوت عالي
مامت مريم : اطلعي من جسمها دلوقتي حالا
هي عملتلك ايه عشان كل ده ... دي اختك !
مريم مكنتش حاسة بكل ده و مكنتش سامعة اللي بيتقال
و كانت على وشك انها تقتل نفسها ب نفس السكينة
لما مامتها و ادهم حاولوا انهم يوقفوها
ضربتهم بالسكينة و اتصابوا اصابات شديدة
مامتها ابتدت انها تصرخ ماللي كانت شايفاه
ووقتها هاني الشخص اللي مامتها عزمته
كان ابتدا انه يقول كلام غريب
عشان يخرج الروح دي من جسم مريم
الروح كانت قوية جدا
و مكنتش عايزة تخرج من جسمها
لكن برحمة ربنا بيها
بعد محاولات كتيرة
ولان مريم كانت محظوظة
قدر هاني انه يخرج منها الروح اللي كانت جواها
بعدها مامتها حكتلها اللي حصل
و انها كان مغمى عليها اثناء كل الاحداث دي
و بعدها خدتها عالمستشفى
و بعد يومين مريم ابتدت انها تتحسن
فالوقت ده مامتها قررت انها تعترفلها
باللي فضلت مخبياه عنها طول السنين دي كلها
مامت مريم : مريم
انا خبيت عنك حاجة حصلت من زمان
لما كنتي صغيرة كان عندك اخت توأم اسمها يارا
يارا كانت شبهك ف كل حاجة
و ف يوم .. كانت ليلة الكريسماس
كنتوا بتلعبوا على سطح البيت لما فجأة زقتيها ووقعت من عالسطح و ماتت
انا عارفة انها مكنتش غلطتك .. انتي كنتي صغيرة
وقتها هاني قاللي انك لما تكملي ٢٥ سنة
روح يارا حترجع تاني و تحاول انها تاخدك معاها
وقتها مريم عرفت ان البنت اللي شافتها فالكوفي شوب
مكنتش بنت حقيقية
كانت روح اختها يارا
و السبب اللي خلاها تظهر تاني بعد كل السنين دي
كان عشان تنتقم من مريم
و تنهي حياتها للابد ..
اشترك في قناتنا عاليوتيوب
تابعنا على صفحتنا عالفيسبوك
اشترك في جروب الفيسبوك
تابعنا على صفحتنا عالانستاجرام
تابعنا على قناتنا عالتيك توك
تابعنا على صفحتنا على تويتر
تعليقات
إرسال تعليق