القصر المسكون
أ/ صبري : اقعد يا ادهم
انا عايز اتناقش معاك بخصوص مقالة جديدة
عن مكان جديد عايزك تروحه
انا : مكان ايه يا استاذ صبري
أ/صبري : ممم .. قصر .. بتاع رجل اعمال كبير اسمه شاكر الجوهري
هو عايش هناك لوحده
بعد وفاة اخوه الكبير شكري الجوهري .. هو ورث المكان
كان عندهم قصر تاني كبير .. اللي كان عايش فيه اخوه شكري قبل ميموت
لكن دلوقتي .. محدش بيروح هناك
ولا حتى شاكر الجوهري
فيه ناس بتقول ان القصر ده مسكون ..
انا : ليه .. ايه اللي حصل هناك ؟!
أ/صبري : شكري ضرب نفسه بالنار جوه القصر ده
و الناس بتقول ان روحه .. سكنت المكان من بعدها
انا عايزك تكتب مقالة عن الحادثة دي
بناءً على تجربتك فالمكان ..
ها .. جاهز يا أدهم ؟!
انا : اكيد !
بعدها ب يومين
ابتدت الرحلة بتاعتي
و اللي اخدت ٣ ساعات كاملين
وأول م وصلت و خرجت مالمطار
شفت راجل كبير واقف عند البوابة
ابتدى يقرب مني و هو بيبتسم
وكان باين من لبسه .. انه سواق شخصي
السواق : اهلا يا فندم
مستر شاكر ف انتظار حضرتك فالقصر بتاعه
اتفضل معايا ..
بعدها ركبت معاه فالعربية
و ابتديت اولع اول سيجارة .. بعد الرحلة الطويلة دي
انا : ااا .. هو حضرتك اسمك ايه ؟!
السواق : جمال يا فندم
تقدر تقولي يا جمال
حاول ترتاح يا فندم
احنا حنوصل المكان ف خلال ساعتين و نص بالكتير ان شاء الله ..
كنا سايقين ف قلب المدينة
بالرغم من اني كنت حابب اثناء الرحلة
اني اشوف منظر الاشجار الموجودة عالطريق السريع
واول مالشمس ابتدت تغرب
بدأت احس بنسمة هوا خفيفة
بتدخل جوه شباك العربية
جمال فعلا كان عنده حق
الطريق اخد حوالي ساعتين عشان نوصل للمكان
لكن منظر القصور و البيوت القديمة اللي شوفتها عالطريق
فكرتني بالعصور والحضارات القديمة
اللي كنت بشوف صورها زمان
و بعد رحلة طويلة
وصلنا اخيرا للقصر ..
وقتها كانت الدنيا ضلمت بالفعل
بصيت ف ساعتي قبل منزل مالعربية .. ووقتها
كانت الساعة ٥:٣٠
انا دلوقتي بدأت رحلتي بالفعل
لاكتشاف شئ جديد غامض
ملوش تفسير ..
على باب القصر الكبير
كان واقف راجل طويل ب دقن كبيرة
و كان بيدخن بايب
ريحة التبغ المحروق .. كانت مالية المكان
لكن كان باين من ريحته .. انه تبغ من نوع غالي
جمال وقف بالعربية
قدام الراجل ده بالظبط
وأول م نزلت مالعربية
شوفت الراجل ده و هو بيقرب مني عشان يحييني
شاكر الجوهري : اهلا اهلا مستر أدهم
انا شاكر الجوهري .. مالك القصر ده .. و مضيفك
انا : ده شرف كبير ليا يا فندم اني اكون ف ضيافة حضرتك
تقدر حضرتك تقولي أدهم ..
مدخل القصر من جوه .. كان ضخم جدا
كل المداخل و الممرات الطويلة
كانت مليانة ب لوح و رسومات قديمة
و انتيكات قيمة جدا
بعدها شاكر اخدني و اعدنا جوه اوضة
شاكر : العشا حالا حيكون جاهز
انا جهزتلك اوضة الضيوف عشان تبات فيها
انا عايزك تعتبر نفسك ف بيتك يا ادهم
وقتها شكرته على كرم ضيافته ليا
الرحلة فعلا .. كانت طويلة جدا
و كنت بالفعل ابتديت احس ب الإرهاق والتعب
و قررت اني اتجه علطول للأوضة بتاعتي بعد العشا
واأجل الموضوع اللي انا جي عشانه
لتاني يوم الصبح لما اكون فقت مالرحلة
انا عمري ف حياتي م كنت شوفت كمية الاطباق دي على ترابيزة سفرة قبل كده
ترابيزة السفرة كانت كافية انها تحسس اي شخص انه ملك
كان فيه لحمة مشوية .. فراخ بالباربيكيو .. عيش لسه مخبوز
جميع انواع السلطات المختلفة .. اسماك .. و حلويات بعد الأكل ..
كل اللي ممكن يخطر على بالك
كان موجود عالسفرة
و كل حاجة فيهم .. كانت لذيذة جدا
انا كنت جعان جدا وقتها
لدرجة اني اكلت كأني مأكلتش قبل كده
حتى مستر شاكر لاحظت انه أكل كتير
أو يمكن وقتها
كان عشان ميحرجنيش ..
و بعد العشا
شكرته مرة تانية على ضيافته ليا
و اتجهت علطول على اوضتي
الأوضة كانت فريدة جدا من نوعها
كان فيها سرير كبير عليه ملاية بيضا
و كان موجود كرسي قيم جدا جمب الشباك
و اللي كان بيطل عالجبال اللي برة
والدفاية الموجودة .. كانت مخلية جو الأوضة دافي ومريح
ابتديت اغير هدومي
و بعدها اترميت عالسرير
لحد م نمت
ف اقل من ثواني ..
و تاني يوم الصبح بمجرد م صحيت
اخدت وقت كبير على م ادركت
ان انا مش ف شقتي الصغيرة
بعدها قمت مالسرير و فتحت الشباك
منظر الوادي المتحاوط بالجبال من كل حتة
كان اجمل منظر
ممكن الواحد يبدأ بيه يومه الصبح
بعدها الخادم خبط عليا و قاللي ان مستر شاكر ف انتظاري
و ان الفطار جاهز تحت
و لما نزلت
شفت مستر شاكر و هو قاعد عالكرسي بيدخن
و كباية الشاي قدامه عالترابيزة
شاكر : اتمنى انك تكون نمت كويس امبارح
انا : كويس جدا .. المكان هادى جدا و مريح
بعيد عن دوشة المدينة و الضوضاء
شاكر : انا متفق معاك تماما
لكن خليني اقولك انك لو عشت هنا كتير
انت ممكن تتعب نفسيا من كتر الهدوء
المهم .. اسألني اي سؤال بخصوص المقالة الجديدة بتاعتك
وقتها قطمت قطمة مالتوست اللي كان موجود قدامي و قلتله
انا : أول سؤال .. هو ايه اللي حصل بالظبط ف القصر التاني بتاعك ؟!!
هو مسكون فعلا ؟!
شاكر : انا عن نفسي مشوفتش اي حاجة غريبة هناك
لكن فيه بعض الناس بيقولوا انهم بيسمعوا صوت خطوات جوه القصر بالليل
كأن فيه حد مقيم جوه القصر
الحقيقة ان بعد موت شكري أخويا
انا بطلت اروح هناك ..
بقيت بروحه مرة كل شهر تقريبا
عشان افحص المكان مش اكتر
لكن دايما .. ده بيكون الصبح
مفتكرش اني روحت بليل قبل كده
انا : لو مفيش مانع من سؤالي يا مستر شاكر
هو اخوك مات ازاي ؟!
شاكر : دي حادثة صعبة جدا
شكري أخويا كان فقد عقله قبل ميموت ب شهر
معرفش كان ايه السبب ف ده .. لكنه فجأة
بقى مش متزن نفسيا
حاولت اكتر من مرة اني اخده عند دكتور صاحبي
لكنه ف كل مرة كان بيحبس نفسه جوه القصر
كان بيقضي وقته كله و هو قاعد جوه لوحده وسط الصمت و الهدوء ده
و ف يوم الصبح
بعت جمال يبص عليه لأنه كان بقاله فترة كبيرة مكلمنيش
لكن ف نفس اليوم
جمال جالي و قالي خبر انتحاره الصادم
شكري انتحر بأنه ضرب نفسه بالنار قبلها ب ٣ ايام
و محدش فينا كان يعرف ده لحد يومها
شكري ف اخر ايامه كان ابتدى يبقى عنيف جدا
و يتعصب من اي حد .. يحاول انه يقتحم حياته الخاصة
عشان كده كان لازم كلنا اننا نديله مساحته الشخصية
محدش كان يجرؤ انه يتناقش معاه ف اي شئ
كان شخص صعب جدا و عقله كان تاعبه
لكن بالرغم من ده
انا لسه ندمان لحد دلوقتي اني مكنتش موجود معاه وقتها
انا : انا آسف جدا اني خليتك تستعيد الذكريات دي مرة تانية .. حقيقي آسف
شاكر : لا لا .. عادي .. انا متفهم ده كويس
انا : ااا الحقيقة انا كنت جي طالب إذن من حضرتك
شاكر : إذن ايه ؟!
انا : انا عايز ابات ليلة فالقصر ده
حاسس ان ده ممكن يساعدني فالمقالة الجديدة اللي بكتبها
طبعا لو حضرتك مكنش عندك اي مانع
شاكر : بالتأكيد مفيش سبب بالنسبالي يخليني امنعك من ده
خصوصا ان مفيش اي حاجة غريبة حصلت فالقصر ده
انا : انا متشكر جدا لحضرتك
بعدها طلعت برة اتفرج عالمناظر الطبيعية
كان لازم اني اوصل القصر ده قبل الغروب
لأن كل الناس .. كانت بتخاف انها تخطي هناك
أول م الليل يجي
جمال و الخادم اللي كان موجود
ابتدوا يجهزوا الشنط بتاعتي و يحطوها فالعربية
و بعدها
سلمت على مستر شاكر
و اتجهت لرحلتي المرعبة
لكن خليني اقولكم
على قد احساس الخوف اللي كان مسيطر عليا وقتها
انا كنت متحمس جدا للمغامرة دي .. اكتر م كنت متوقع
واثناء م كنا فالطريق .. سألت جمال
انا : مستر شاكر قاللي انك كنت اول واحد يشوف مستر شكري و هو ميت .. صح ؟!
جمال : صحيح يا فندم .. كان منظر بشع
مستر شكري كان مرمي عالكرسي بتاعه وايديه الاتنين مفتوحين
وشه كان كله دم .. و هدومه كلها كانت غرقانة بالدم
مخه كان طالع من مكانه
و المسدس اللي انتحر بيه .. كان مرمي جمبه عالارض
كان منظر صعب جدا
بعدها جمال قفل عينه بمجرد م افتكر المنظر
و بصراحة
انا محاولتش وقتها اني اسأله
عن اي حاجة تانية
وأول م وصلنا عند القصر
كانت الدنيا ضلمة جدا فالمكان
اصوات حيوانات البرية مع صوت صرصور الحقل
كانوا عاملين جو مرعب جدا فالمكان
كأنه مشهد من فيلم رعب
جمال : خلي بالك من نفسك يا استاذ أدهم
انا حعدي عليك بكرة الصبح عشان أوصلك
و بعدها .. جمال مشى
وانا فضلت واقف بتفرج عليه .. لحد م اختفى مالمكان
بعدها دخلت جوه القصر
و كان ضوء القمر هو الضوء الوحيد
اللي منور المكان
و بعدها .. اتجهت علطول ل اوضة مستر شكري
و قعدت على كرسي كان موجود جمب الشباك
كنت قادر اشوف منظر الجبال و السما الصافية
وسط الهدوء اللي كان محيط بالمكان
بعدها ولعت سيجارة
لكن على ضوء الولاعة
عيني وقعت على ترابيزة طويلة
على الجنب التاني مالأوضة
و كان موجود جمبها كرسي خشب كبير
متهيألي ده نفس الكرسي
اللي مستر شكري انتحر عليه
بصراحة و مش حكدب عليكوا .. لكني وقتها
الخوف ابتدى يتمكن مني
بعدها الوقت ابتدى يمر
لكن مكنش فيه اي حاجة غريبة بتحصل فالقصر
ووقتها ادركت
ان كل الاشاعات اللي كانت بتقول ان القصر مسكون
كانت مجرد اشاعات مش اكتر
وبعدها
غمضت عيني وانا فاقد الأمل
فالمقالة اللي المفروض انها تتكتب
مش قادر احدد وقتها كان الوقت امتى
لكني متأكد انه كان بعد نص الليل
كان هدوء مميت فالمكان .. لحد م فجأة
ابتديت اسمع صوت خطوات فالممر اللي برة الاوضة
فيه حد كان بيتحرك جوه القصر
وقتها محاولتش اني اولع اي نور فالأوضة
عشان كده كان ضوء القمر
هو الضوء الوحيد اللي منور المكان
و بعدها
باب الأوضة اتفتح لوحده
و صوت الخطوات ابتدت تقرب اكتر و اكتر
و ف اقل من ثواني
شوفت شخص واقف على باب الأوضة
مكنتش قادر اشوف وش الشخص ده فالضلمة
عشان كده وقتها سألت
انا : مين هنا ؟!
الشخص : انت ازاي تجرؤ انك تسألني السؤال ده ف بيتي !
انا : ااا انا آسف يا مستر شكري
مكنتش اعرف ان حضرتك حتيجي
كنت خايف جدا و مرعوب مالموقف اللي كنت فيه
لكني حاولت اكون هادي على قد م اقدر
لأني كنت عايز اعرف الحقيقة ..
و بعدها سألته
انا : هو انت ليه انتحرت يا مستر شكري
هو فيه حاجة كبيرة حصلت ؟!!
شكري : انا حياتي كانت صعبة جدا
و مكنتش قادر اتحمل اكتر من كده
عشان كده استسلمت
انا : طيب .. المكان اللي انت فيه دلوقتي
عامل ازاي ؟!!
شكري : هادي و مريح
انا مبسوط هنا
انا مش بلوم اي حد على ... على ... انت مين !
وقتها قمت بسرعة من مكاني
و جريت ف اتجاه الباب وانا بقول
انا : مستر شاكر !
انت بتعمل ايه هنا !!
لكني قبل مكمل كلامي
شفت مستر شاكر و هو واقف بيرتعش ف مكانه
كان واقف مرعوب و هو بيبص على حاجة كانت ورايا
لدرجة ان وشه كله اتحول ل اللون الاصفر
واول م بصيت ورايا
شوفت واحد شكله مرعب جدا ووشه كله دم
كان واقف جمب شباك الأوضة
مخه كان طالع برة دماغه
و عينه الشمال .. كانت متعلقة على وشه
و بعدها
ابتدى يتكلم بصوت شيطان
الشبح : قاتل .. كداب
انت كنت بتخدرني يوم ورا التاني
و بعدها قلت للناس اني اتجننت و بقيت مش طبيعي
كنت عايز تخلص مني عشان تاخد ورث العيلة كله لوحدك
عشان كده كان لازم تمحي اي حد
قصاد طمعك و جشعك ..
شاكر : انا .. انا اسف يا شكري
اااا انا مكنش قصدي اقتلك
انا عارف اني كدبت و قلت انك انتحرت
بس عشان خاطري تسامحني
عشان خاطري تسيبني امشي
شبح شكري : انت بتحلم
فالليلة دي انت اتسللت للقصر بتاعي زي الحرامية
اثناء منا كنت متخدر بسبب الحبوب اللي كنت بتديهالي
ربطتني فالكرسي و ضربتني طلقة ف دماغي
و بعدها .. مسحت كل اثار جريمتك و هربت
عشان تبان انها مجرد حادثة انتحار
انا طول الوقت ده وانا مستني
انك تيجي القصر ده مرة تانية
محدش حيحميك مني الليلادي ..
و بعدها
شاكر ابتدى يصرخ ب أعلى صوته
و هو بيحاول انه يجري و يهرب مالمكان
لكن ف اقل من ثانية و قدام عيني
شئ خفي رفع شاكر فالهوا لحد السقف
و بمنتهى العنف
رماه فجأة عالارض
لدرجة ان دماغه اتفتحت .. و بقت كلها دم
و بعدها
ابتدى شاكر يصرخ و يصرخ اثناء مالشئ الخفي ده
كان بيخبط دماغه فالارض بكل قوة
لحد م دماغه اتكسرت و مخه طلع منها
فضلت قاعد عالارض وانا مصدوم
و مش قادر انطق ب كلمة
وانا شايف قدامي جسم مستر شاكر وهو بيتعذب و بيصارع
لحد م ف ثانية
سكت للأبد ..
بعدها بصيت على شبح شكري الجوهري
و اللي قاللي بصوت مرعب
شبح شكري : اتمنى انك تقول الحقيقة
و بعدها
اتبخر فالهوا
و اختفى مالمكان
و بعد الحادثة دي
الشرطة وصلت للقصر و ابتدت التحقيقات
لكن لحسن الحظ
انا كنت مسجل كل اللي حصل فالليلة دي
و برغم ان صوت شكري الجوهري
مكنش ظاهر ف كل التسجيلات
إلا ان اعترافات شاكر الجوهري
كانت هي الدليل الوحيد
اللي خرجني براءة مالقضية
و لحد دلوقتي
محدش قادر يتخيل الطريقة البشعة
اللي شاكر الجوهري مات بيها
لدرجة ان الشرطة لسه بتحقق فالمكان لحد دلوقتي
لكني بعتقد ان روح شكري الجوهري
مبقتش موجودة خلاص فالمكان
فالنهاية .. هو بالفعل انتقم
واخد اللي هو عاوزه ...
تعليقات
إرسال تعليق