القرية المرعبة
الجزء الخامس
الحلقة ٥
يوسف .. يوسف
وقتها فقت على صوت مدام نادية و هي طالعة بتجري من اوضتها وبتنادى على ابنها يوسف
نادية : ابني ... ابني ايه اللي حصله ؟!
دكتور وائل جه يجري بسرعة اول مسمع صوتنا
شلنا يوسف و دخلناه السرير
و فضل نايم طول الليل
و الصبح
كلنا اتجمعنا تحت فاللوبي بتاع الاوتيل
مدام نادية سألت دكتور وائل
نادية : هو ايه اللي حصل لابني يا دكتور ؟!
هو مش متعود يخرج مالاوضة بدون اذني !
معرفش ايه اللي خرجه برة الاوضة ف نص الليل
و ايه الجرح اللي على رقبته ده ؟!
وقتها مس فاتن قالت
فاتن : دكتور وائل
ارجوك ساعدنا اننا نفهم ايه اللي بيحصل هنا
فالوقت ده انا كنت واقف ساكت و قاعد بسمعهم
و لاول مرة .. انا كنت خايف بجد
وقتها دكتور وائل بصلي و قال
دكتور : يوسف نزف دم كتير امبارح
معرفش ايه اللي ممكن يكون عضه
بس النزيف كان من الجرح ده
انا حكلم صديق ليا
و حناخد يوسف عالمستشفى عشان يتعالج
خلينا بس نعدي الليلادى على خير
و بكرة كلنا نسيب المكان ده
بعدها بص ل ميس فاتن و قال
دكتور : انا اسف يا مس فاتن
بس احنا لازم نمشي من هنا فعلا
كان موقف دكتور وائل غريب جدا بالنسبالي
كان هو الوحيد اللي كان بيتكلم عن وجود حيوان او مصاص دماء فالقرية
و ان هو ده السبب ورا موت عم ابراهيم
و دلوقتي ورا اللي حصل ل يوسف
لكن فجأة قرر انه يمشي و يسيب كل ده
بعدها كل واحد راح الاوضة بتاعته
وانا طلعت الجنينة عشان اشرب سجارة
من ساعة م جيت القرية دي
و مفيش اي حاجة كويسة بتحصل
و بقيت حاسس اني تايه
وفجأة
ايد ضربتني على كتفى
لفيت بسرعة عشان اشوف مين
كان دكتور وائل هو اللي واقف
و ابتدى يشاورلي بصباعه
اني معملش اي صوت
بعدها طلب مني اني امشي وراه
من غير مسأل اي سؤال
مشيت وراه لحد م فجأة وقف و قاللي
دكتور : اكرم
انا محتاج مساعدتك عشان نقدر اننا نمسك الوحش ده
رديت عليه
انا : لكن انت قلت انك مش ...
وقتها قاطعني قبل مكمل الجملة و قاللي
دكتور : انا مجهز فخ للوحش ده
انا متأكد انه مسخبي وسطنا
وقتها عيني برقت و قلتله
انا : انت تقصد ايه ؟!
ان فيه مصاص دماء
عايش معانا هنا فالاوتيل ؟!!
قرب مني و قاللي بصوت واطي
دكتور : امبارح بليل
كنت قاعد بفكر فالكلام اللي قاله يوسف بخصوص الشبح
و ف نص الليل
سمعت خطوات ورا شباك الاوضة بتاعتي
واول م بصيت
شفت ست بتتحرك نحية اوضة يوسف
وشعرها كان طاير فالهوا زي ما يوسف قال
الشبح اللي يوسف شافه مكنش واحد
كانت واحدة
فالوقت ده رديت و قلتله
انا : طيب انت ليه مقلتش الكلام ده واحنا جوه ؟!
بص للسما و قاللي
دكتور : لان الشبح ده كان واقف وسطنا
مدام نادية اخدت وقت كبير على م طلعت من اوضتها امبارح
انا متأكد انها كانت بتغسل اثار الدم من على بقها
انا : نعم !
انت تفتكر ان فيه ام ممكن تأذى ابنها ؟!
رد عليا
دكتور : فاكر اليوم اللي مات فيه عم ابراهيم ؟!
كانت هي الوحيدة اللي معلقتش على موته
و كانت بتطلب مننا اننا منتكلمش فالموضوع
وقتها معرفش ايه اللي حصلي
بس كنت حاسس اني مش عارف ارد على كلام دكتور وائل
لأن بصراحة
كلامه كان منطقى
بعدها بص عالاوتيل و قاللي
دكتور : النهارده بليل
حندخل اوضة يوسف
و نمسك الوحش ده عشان نخلص عليه
خليك جاهز بعد العشا
و بعد م خلص كلامه
سابني و مشى
و فضلت واقف لوحدى مش فاهم اللي بيحصل
مدام نادية !.. كانت هي الشبح !
كانت هي اللي بتمص دم الناس و تقتلهم !
و دلوقتي كانت عايزة انها تنهي حياة ابنها !
اين كانت ايه الحقيقة
ف احنا حنعرفها الليلة...
اشترك في قناتنا عاليوتيوب
تابعنا على صفحتنا عالفيسبوك
اشترك في جروب الفيسبوك
تابعنا على صفحتنا عالانستاجرام
تابعنا على قناتنا عالتيك توك
تابعنا على صفحتنا على تويتر
تعليقات
إرسال تعليق