وادي الذئاب
من حوالي ٧ سنين ف فصل الشتا
انا و اخويا قررنا اننا نروح نقضى الاجازة بتاعتنا ف بيت عمي ف وادي الجبال
عمي كان عنده بيت هناك
لكنه مكنش قاعد فيه
فاليوم ده فضلنا سايقين اكتر من ٣ ساعات عشان نوصل للمكان
المكان هناك كان مقطوع
لدرجة ان اقرب اوتيل لينا
كان على بعد ٧٠ كيلو
لكن لأننا كنا صغيرين وقتها
كنا حابين اكتر هدوء الطبيعة الموجود فالمكان
انا و اخويا كنا دايما بنتدرب عالتزلج على الجليد
عشان كده اول م وصلنا
كل اللي كان نفسنا نعمله
اننا نطلع نمارس هوايتنا المفضلة
و نتزحلق وسط الجليد
ابتديت ازمر بالعربية اول م وصلنا عند باب البيت
ووقتها
شفنا ولد صغير عنده حوالي ١٤ ١٥ سنة
كان طالع بيجري مالبيت
كان شكله صغير جدا بس كان فيه ابتسامة هادية على وشه
لكن عينيه كانت مقفولة
كأنه تعبان و منمش من يومين
ابتدى ياخد الشنط مننا و احنا دخلنا وراه
ولما دخلنا جوه البيت
البيت كان صغير و مصنوع كله مالخشب
و كان فيه دفاية كبيرة فالاوضة
و كان موجود جمبها خشب عشان لو حبينا نشغلها
الولد : اصل الدنيا بتكون ساقعة جدا بليل
قالنا كده بصوت هادي و هو بيبصلنا
اخويا رد عليه
بأننا حنخرج نتزحلق عالجليد
عشان كده حيكون من الافضل انه يحضرلنا العشا على منخلص
الولد ابتسم و هزلنا دماغه انه موافق
بعدها لبسنا لبس التزلج
اخدنا المعدات بتاعتنا
و ابتدينا تزلج وسط الغابات
الاشجار كلها كان مفيهاش ورق ... و كان عليها جليد كتير
لكن الجليد كان منور وهو بيعكس من عليهم اشعة الشمس
كنا بنتحرك ببطئ لأن الرياح وقتها كانت جامدة جدا
و كنا وصلنا ل نص الغابات لما التلج ابتدا انه ينزل علينا
ووقتها قلت لاخويا
انا : خلينا نريح شوية و بعدها نبقى نرجع تاني
رد عليا بأنه موافق
و ابتدينا ناخد المعدات بتاعتنا عشان نرجع
و فالطريق و اثناء ما كنا ماشيين فالغابات وسط الاشجار
فجأة سمعنا صوت غريب
كأنه صوت حيوان متوحش
وقفنا عشان نشوف مصدر الصوت ده
ووقتها
شفنا عند الشجرة اللي قدامنا
راجل شكله غريب و كان باصص فوق للسما
التلج كان مغطي وشه كله
و مكناش قادرين نشوف غير رقبته الطويلة و كتافه العريضة
كان واقف وقفة غريبة و مبيتحركش
بصيت لاخويا و كنا احنا ال ٢ حاسين بخوف من منظره
الراجل كان شكله مريب جدا
وقتها بصيت لاخويا و شاورتله اننا نرجع خطوات لورا ببطئ من غير منعمل اي صوت
عشان ميحسش بينا
و بعدها نجري لحد البيت بتاعنا
و فعلا ابتدينا نرجع ٣ خطوات لورا لما فجأة
دوست على فرع شجرة كان موجود عالارض
واول مالفرع اتكسر و عمل صوت
الراجل نزل راسه و بصلنا
كان شكله مرعب جدا
عينيه كان لونها احمر و كانت بتنور كانه ذئب
و كان فيه دم كتير مغطى بقه كله
واول مبصيت على ايديه
شفته كان ماسك ارنب ميت ف ايده اليمين
و كانت بطنه مفتوحة و معدته طالعة منها
ابتدى يمسح بايده الدم من على بقه
و ابتسم ابتسامة كبيرة
كانت اكبر ابتسامة مرعبة انا شفتها ف حياتي
وقتها شفت اخويا بيصرخ و بيقولي
اجري .. اجري بسرعة
ابتديت اجري بكل قوتي
و اخويا كان بيجري ورايا
و مكناش قادرين نشوف
هل الراجل ده كان بيجري ورانا ولا لأ
فضلنا نجري لحد ما نفسنا راح
واول م وصلنا للبيت
دخلنا جوه و قفلنا الباب بالمفتاح
الولد الصغير اللي كان موجود
سمع صوتنا و ابتدى يحس ان فيه حاجة مش مظبوطة
طلع مالمطبخ عشان يسألنا ايه اللي حصل
ووقتها انا صرخت ف وشه
انا : اتصل بالبوليس دلوقتي حالا
الولد : ليه .. ايه اللي حصل ؟
بعدها اخويا رد
اخويا : انا معنديش شبكة فالتليفون بتاعي
وقتها بصيت فالموبايل بتاعي
و عرفت ان اخويا كان فعلا عنده حق
الولد : الشبكة مقطوعة هنا بسبب الجو
هو ايه اللي حصل هناك ؟!
كنت على وشك اني احكيله اللي حصل
لكن اخويا قاطعني لانه حس ان الولد الصغير ممكن يخاف
لو حكيناله اللي حصل
عشان كده وقتها قلناله
اننا سمعنا صوت حيوان فالغابات
بعدها دخل المطبخ عشان يكمل تجهيز العشا
و بعد نص ساعة
كنا ابتدينا نهدا و حسينا باحراج قدام الولد الصغير
لأننا كنا خايفين من مجرد حيوان
عشان كده بطلنا نفكر فالموضوع
و دخلنا الاوض بتاعتنا عشان نريح
و بعد شوية
كنا طالعين مالاوض عشان نتعشى لما فجأة
النور قطع
و ابتدينا نسمع صوت عاصفة تلجية برة البيت
كنت سامع صوت الازاز و هو بيتهز من قوة الرياح
انا : ااا انت فين ؟!
هو كان اسمه ايه
اخويا : احنا مسألنهوش اسمه ايه
فضلنا انا و اخويا ندور عالولد الصغير اللي كان موجود معانا فالبيت و فجأة
سمعنا صوت خطوات رجلين.. كان معناها
ان فيه شخص موجود برة البيت
انا و اخويا دورنا وشنا ناحية شباك الاوضة اللي كان موجود جمب الدفاية
ووقتها
شفنا نفس الراجل المرعب اللي شفناه وسط الاشجار
كان واقف ورا شباك الاوضة
و كان ساند على الازاز ب ايديه اللي كلها دم
و لازق وشه فالازاز بطريقة مرعبة
و اثناء ما كان بيبصلنا
فجأة فتح بقه و ابتدى يلحس الدم الموجود على وشه
عينيه مكنتش بترمش
و لا بتتحرك من علينا
صوتي ابتدى انه يختفى
و كنت متجمد ف مكاني من كتر الخوف
و فجأة الولد الصغير دخل علينا
كأنه كان مستخبي مننا طول الوقت ده
الولد : فيه اي مشكلة ؟!
انا : هو .. هو ده .. هو ده نفس الراجل اللي شفناه الصبح
الولد : هو ده ؟!
ابتدى الولد الصغير يتحرك ناحية الشباك
وابتدى يحط ايده عالازاز ف نفس المكان
اللي كان الراجل المرعب حاطط ايده عليه
بعدها دور وشه و بصلنا
و كان على وشه نفس الابتسامة المخيفة
اللي كانت على وش الراجل
الولد : ده ابويا .. متخافوش منه
انا : ايه .. ابوك !
الولد : متخافوش منه .. هو مش مؤذي
طالما لقا الاكل بتاعه
وقتها جريت واخدت مفاتيح العربية بتاعتي
و شديت ايد اخويا و فتحنا باب البيت
عشان نجري بسرعة عالعربية
ووقتها مخدناش بالنا اننا كنا حافيين
حتى مكناش لابسين لبس تقيل
كل اللي كنا لابسينه ساعتها
كانت بيجامة النوم
لكننا مكناش مهتمين بكل ده
لان كان كل اللي فارق معانا وقتها
اننا نعيش
وقتها سمعنا صوت الولد الصغير بيضحك و يقول
الولد : متخافوش منه هو مبيخوفش
هو بس بيحب يصطاد الفريسة بتاعته
دورت العربية و طلعنا عالطريق
كل شنطنا كانت جوه البيت
بس مكنش فيه وقت عشان نرجع ناخدها
فضلنا سايقين اكتر من ساعتين
لحد م وصلنا لاوتيل
كان موجود ف نص الطريق
العاصفة التلجية كانت مخلية السواقة خطر جدا عالطريق
بس مكنش ينفع باي حال من الاحوال
اننا نقعد ف نفس البيت مع الاب و الابن المجانين دول
و اول موصلنا الاوتيل اتصلنا بعمي عشان نحكيله عاللي حصل
و عن الولد الصغير اللي كان موجود فالبيت و عن ابوه المرعب
لكن اللي عمي قالهولي وقتها
خلاني اتجمدت ف مكاني
قاللي ان مفيش ولد صغير فالبيت هناك
و ان عمره م عين حد او جاب حد يشتغل هناك
و ان المفاتيح بتاعة البيت
كان دايما بيسبها تحت الدواسة
فكرة اننا كنا موجودين ف بيت واحد
مع شخص مجهول هو و ابوه المرعب
خلت جسمي كله يتكهرب من كتر الخوف
اديت التليفون لاخويا
لاني مكنتش قادر اتكلم وقتها
و ابتدى انه يشرح لعمي كل اللي حصل هناك
و عن الولد الصغير و ابوه المجنون المرعب
و بعدها عمي اتصل بالبوليس
و فاليوم التاني اتجهنا عالبيت مع الشرطة
لكن مكنش فيه حد هناك
حتى الشنط بتاعتنا كانت اختفت
اكيد هما اللي اخدوها
مكنش معانا فلوس ولا هدوم
حتى مكنش معانا حاجة نلبسها ف رجلينا
المكان كان فاضي تماما
و فاليوم التاني
كلمت ابويا عشان يجي ياخدنا مالاوتيل و يدفع المصاريف
لان مكنش معانا فلوس
و لحد دلوقتي
انا لسه فاكر تفاصيل الحادثة دي كانها كانت امبارح
و محدش عارف ايه اللي كان ممكن يحصل
لو المجانين دول كان معاهم اسلحة فاليوم ده
و من بعدها
اخدت قرار
اني عمرى م حفكر اني اروح اي مكان مقطوع مرة تانية
لبقية حياتي
اشترك في قناتنا عاليوتيوب
تابعنا على صفحتنا عالفيسبوك
اشترك في جروب الفيسبوك
تابعنا على صفحتنا عالانستاجرام
تابعنا على قناتنا عالتيك توك
تابعنا على صفحتنا على تويتر
تعليقات
إرسال تعليق