شبح الفلانتين
انا اسمي عمر
والسنة اللي فاتت ف يوم الفلانتين
حصلي حادثة مأساوية كبيرة
رشا خطيبتي ماتت ف حادثة عربية
انا و رشا كنا مخطوبين لمده اربع شهور
لكننا كنا نعرف من اكتر من ست سنين
كنا نعرف بعض من ايام المدرسه
وكنا على وشك اننا نكتب الكتاب
خلال الاسابيع اللي جاية
لكن وفاتها في حادثه العربيه
دمرني وسببلي صدمه نفسية
فضلت اعاني من اكتئاب لفتره كبيره جدا
وكنت شايف ان من الصعب
اني اقدر اتخطى فقدانها
لكني دلوقتي بدأت اتحسن
و خلال الفترة اللي فاتت
اهلي واصحابي كانوا دايما بيقترحوا عليا
اني احاول اتخطى الموضوع ده
وابدا ادور على حب جديد
لاني عندي 26 سنه ويعتبر لسه صغير في السن
ولسه قدامي حياه طويله
لحد ما جه يوم ١٣ فبراير اللي فات
وسببلي صدمة اكبر من الصدمة اللي فاتت
القصة بدات يوم 13 فبراير اللي فات
كنت قاعد بفتكر انه هيبقى عدى سنه
على وفاه رشا
لكني بدل الدخول ف حاله جديده من الاكتئاب بسبب فقدانها
و بسبب ضغط اهلى و اصحابي
قررت اني ادي لنفسي فرصه جديده
مع البنت اللي معايا في الشغل
في الليله دي رجعت البيت بعد يوم طويل فالشغل
وقررت اني احضر لنفسي العشا
وبعدها ادخل السرير لما فجاه
جاتني رساله على الموبايل
في البدايه
قلت دي اكيد رساله من البنت الجديده
اللي هخرج معاها بكره ... سلمى
الرساله كانت بتقول انت وحشتني جدا
لكن الشئ الغريب
انها كانت مبعوته من رقم رشا خطيبتي
ازاي حاجه زي دي ممكن تحصل ؟!!
احنا بالفعل كنا وقفنا الخط بتاعها بعد رحيلها بكام شهر
ازاي انا دلوقتي جاتلي رساله من نفس الرقم بتاعها
ممكن يكون في حد اخذ الرقم بتاعها بالصدفه
اكيد هو ده اللي حصل
مستحيل ان يجيلي رساله من نفس الرقم بتاعها
بعدها قررت اني اتجاهل كل الافكار دي وبدات احضر العشا لكن بعدها بدقائق
جاتلي رساله تانية
بس المرادى
ما كانتش رساله مكتوبه
كان تسجيل صوت
من نفس رقم رشا
اكيد الرقم ده في واحده اخذته وبتحاول انها تتواصل مع حبيبها
انا لازم ارد عليها واعرفها ان الرقم غلط
لكن بالرغم من كل ده
فكره اني اشوف اسم رشا
بيرن تاني على موبايلي بعد حوالي سنه
كان شيء صعب جدا بالنسبه لي
ومكنتش عايز اني ادخل تاني في دوامه اكتئاب
خصوصا اني اخذت وقت كبير جدا عشان احاول اخرج منها
لكن اكيد مش هيحصل حاجه لو سمعت الرساله اللي جاتلي مش كده ؟!! متهيألي يعني
وقتها دوست على الزرار وشغلتها
وابتديت اني اسمع الرساله
رشا : حبيبي ازيك انا رشا
اتمنى ما تكونش نسيتني
حبيت بس اني اقول لك هابي فالنتاين
لاني ما عرفتش اقولها لك اخر مره
بس انا عايزاك تعرف ان انا لسه بحبك
انا ممكن اني انسى اي حاجه في الدنيا كلها
الا الصوت ده
ده صوت رشا
مستحيل يكون ده بجد !!
وقتها الافكار كلها وقفت في دماغي
كنت مصدوم ماللي سمعته
و مكنتش عارف المفروض اعمل ايه
وبيني وبينكم ... كنت خايف جدا وقتها
حاولت اني اتجاهل الرساله
وسبت التليفون جنبي وابتديت اني اكمل تحضير العشا
وكان عدى حوالي ساعه من غير اي رساله جديده
و لما خلصت
حطيت الاكل بتاعي في الطبق
وطلعت بره عشان اشغل التلفزيون لما فجاه
الموبايل رن تاني
قلبي ابتدى انه يدق جامد
وكنت خايف اني ابص اشوف الرساله اللي جاتلي
لكني شفتها في الاخر
الاسم اللي كان ظاهر على الموبايل
كان سلمى
وقتها ضربات قلبي ابتدت تهدى
كانت هي البنت اللي معايا في الشغل
واللي المفروض اني اخرج اقابلها بكره
كانت بعتالي اسم المطعم والوقت اللي هنتقابل فيه
كانت بتاكد على ميعادنا بكره
ووقتها رديت عليها باني هكون موجود هناك
و بعدها بدقايق
جاتلي رساله تانيه
وقتهل قلت دي اكيد سلمى
عشان كده ما بصيتش على الاسم وفتحت الرساله على طول لكن اللي كان مكتوب في الرساله
خليني اتجمدت في مكاني
انت ممكن تعرف حد غيري يا عمر ؟!
ايا كان مين اللي بيبعتلي الرسائل دي
هو يعرف اسمي
اكيد ده مش رقم غلط
الرسائل دي مقصوده
حاولت اني اتجاهل الرسائل دي وكملت العشا بتاعي
لكن فجاه وبدون اي سبب
حسيت ان في شخص موجود معايا في الاوضه
كان شيء غريب جدا خصوصا ان انا الشخص الوحيد
اللي عايش في البيت
كنت بتفرج على التلفزيون وقتها لما فجاه
شفت بطرف عيني خيال واحده لونه اسود
كانت بتمشي في اتجاه الاوضه بتاعتي
وقتها كنت حاسس اني بهلوس
اكيد اللي انا شايفه ده مش حقيقي
انا عارف ان اليوم اللي جاي هيكون يوم صعب جدا عليا
عشان كده اكيد عقلي بيلعب معايا الاعيب مش حقيقيه
لكني بعدها بدقايق
لمحت نفس الشبح ده كان بيخرج من الاوضه بتاعتي
وكانت بتقرب من الكنبه اللي كنت قاعد عليها
وقتها كنت خايف جدا اني ادور وشي وابص عليها
كنت بحاول اني اركز في التلفزيون
اثناء ما هي كانت بتقرب مني
وفجاه الكنبه اتهزت وقعدت جنبي
الشبح الاسود ده كان قاعد جنبي على نفس الكنبه
ومكنش عندي الشجاعه وقتها اني ابص عليها
رشا : انت ما بتردش عليا ليه ؟!!
وقتها دورت وشي علطول وبصيتلها
لاني كان لازم ابص
كان نفس صوت رشا
لكني اول ما بصيت عليها
ما كانتش رشا خطيبتي
كانت كيان شيطاني شبهها بالظبط
لكن عينيها كلها كانت حمراء وبيخرج منها دم
وكانت لابسه فستان فرح لونه اسود
وطرحه سوداء على وشها
اخر حاجه فاكرها في اليوم ده
كانت عينيها المرعبه اللي كانت بتبصلي
وبعدها
ما حسيتش بحاجه
دلوقتي انا موجود في مستشفى
اخويا الكبير طارق
قال انه لقاني مرمي في الشقه بتاعتي ومغمى عليا على الكنبه في يوم الفالنتاين
و النهارده يوم 16 فبراير
وده معناه ان انا بقالي ثلاث ايام ف غيبوبة ماللي حصل
حاولت اني اشرحلهم اللي حصل ليلتها
لكن ما حدش صدقني
الدكاتره كلهم قالوا ان دي اكيد هلوسه
بسبب كثر الحبوب المنومه وادويه الاكتئاب اللي كنت باخدها لكني متاكد اني ما اخذتش ولا حبايه واحده في اليوم ده
يبقى ازاي كلامهم ده صح
وبقيت كل ما احاول اني اقنع اهلي اني شفت شبح رشا في الليله دي
كل ما بيشكوا اكتر ان انا اتجننت
بس انا ما اتجننتش
انا مش فاهم ليه محدش فيهم مصدقني
وعشان اثبت لهم اني فعلا مش بكذب او بهلوس
طلبت من طارق اخويا انه يجيب لي التليفون بتاعي
لكنه قاللي ان التليفون بتاعي
كان مرمي على الارض جنبي ومكسور
كأن حد مسكه وكسره 100 حته
لكن انا ما عملتش كده
وقتها اهلي والدكاتره كلهم قالوا ان انا اكيد الليله دي
جاتلي نوبه اكتئاب جامده وفقدت السيطره على نفسي
عشان كده كسرت الموبايل بتاعي
الموضوع كله محير فعلا
وابتديت احس اني بدأت اتجنن بجد
و السؤال الاهم
هل انتم فعلا مصدقين قصتي ؟!!
ولا شايفيني مجنون ؟!
زي ما اهلي والدكاتره كلهم شايفين
وهل بعد كل اللي حصل ده
تفتكروا اني حقدر ف يوم مالايام
اني اعرف واحدة تانية بعد رشا
او حقدر اني احتفل بالفالنتاين مره ثانيه
ولا لا؟!!
اشترك في قناتنا عاليوتيوب
تابعنا على صفحتنا عالفيسبوك
اشترك في جروب الفيسبوك
تابعنا على صفحتنا عالانستاجرام
تابعنا على قناتنا عالتيك توك
تابعنا على صفحتنا على تويتر
تعليقات
إرسال تعليق