القائمة الرئيسية

الصفحات

تعديل المشاركة

قصص رعب انيميشن - الاختفاء الغامض - رعبيات

(0)


 

سلسة ما وراء الطبيعة

الاختفاء الغامض


الخريف اللي فات
انا و صحابي مازن و طارق
قررنا اننا نطلع سفرية لجبال الجليد ف كندا
اكيد انتو ملاحظين اننا احنا ال ٣
بنحب المغامرات جدا
و خصوصا مغامرات الجبال

وقتها كنا مأجرين كابينة صغيرة وسط الجبال 
لأننا كنا مخططين اننا نطلع الجبال المحيطة 
ابتدينا نبني الخيمة و نجهز المعدات بتاعتنا
و فاليوم التاني صحينا و طلعنا نستكشف الجبال 
و بعدها رجعنا تاني للكابينة
لكن خليني اقولكوا ان الكابينة دي 
مكنتش زي اي كابينة تانية مبنية وسط الجبال

كانت كابينة حراسة قديمة
لكن دلوقتي
بقت بتتأجر للمسافرين
الكابينة  كانت مبنية على بعد اميال
من المكان اللي كنا جايين عشانه

اليوم اللي وصلنا فيه الكابينة كان يوم مشمس
على الرغم من ان كان فيه شوية جليد
من اليوم اللي قابله
كنا تعبانين جدا مالسفر 
عشان كده وقتها عملنا الاكل بتاعنا 
و جهزنا الشنط بتاعتنا لليوم التاني
و دخلنا ننام

و الساعة ٥ الفجر 
صحيت على صوت مازن
مازن : اصحى يعم ..  بص عالشباك .. فيه عاصفة تلجية
وقتها صحيت من نومي و بصيت عالشباك
و لسوء الحظ
كان فعلا فيه عاصفة جامدة

انا : ايه الحظ ده
احنا المفروض كنا نطلع رحلتنا الصبح

طارق: ايوه فعلا حظنا وحش جدا
بس الجانب الايجابي 
اننا نقدر اننا نقضي وقتنا فالكابينة
و كمان احنا معانا اكل يكفينا لمدة يومين 
خلينا نستنى لحد مالعاصفة التلجية دي تخلص

و ف خلال اليومين دول
انا و صحابي كنا مقيمين فالكابينة
و مكناش بنخرج برة 
غير عشان نشم شوية هوا 
او نجيب مياه 

و فاليوم التاني بليل و اثناء ما كان طارق نايم 
انا و طارق كنا قاعدين برا بنلعب كوتشينا لما فجأة
حد خبط على باب الكابينة 

مكنتش خبطة مخيفة او خبطة حيوان
كانت مجرد خبطة عادية
كنا بس قلقانين من فكرة ان مين اللي ممكن انه يجي يخبط
ف وسط العاصفة التلجية دي
لكن وقتها انا و مازن 
قررنا اننا نفتح الباب
لأننا شكينا ان ممكن يكون حارس من حراس الجبل
جي يطمن عليا
لكننا اول م فتحنا الباب
شفنا منظر مرعب

شفنا راجل كبير جسمه كله متغطي بالتلج
كان لابس جاكت خفيف
و كان مرمي قدام باب الكابينة بتاعتنا
و من غير اي تفكير وقتها
انا و مازن شلناه و دخلناه جوه الكابينة
و قعدناه جمب الدفاية 
مكنش قادر انه يتكلم او حتى يتحرك
ووقتها طارق كان صحى بسبب صوتنا
و طلع برا يحاول انه يتكلم مع الشخص ده

ابتدى مازن يسخن الشوربة 
و جاب بطانية كبيرة 
عشان يغطي بيها الراجل 
وأول مالراجل هدا و ابتدى يفوق
سألناه ايه اللي حصل !

الراجل: انا اسمي جوزيف
و من يومين انا و ابني رامي 
قررنا اننا نتسلق الممر الموجود بين الجبال 
لكن بعدها علطول العاصفة التلجية بدأت
و توهنا فالجبال
انا و ابني رامي مكنش معانا اكل 
ولا حتى معدات تتبع
لأننا مكناش ناويين اننا نكمل الممر لاخره
احنا بس كنا عايزين اننا نوصل للكباين اللي فوق و نلف حواليها
و كنا مقدرين ان ده حياخد مننا نص يوم عشان نكمله
لكن فجأة العاصفة ابتدت
و ابتدينا نتوه وسط الجليد 
لأن معناش اي معدات تتبع
ووقتها قررنا اننا نخيم فالجبال لحد مالليلة تعدي
لكننا مقدرناش نكمل بسبب الجفاف و نقص الاكل
و بعدها ابني تعب جامد 
و مبقاش قادر حتى انه يتحرك معايا عشان نشوف طريق للرجوع

وقتها كنا حاسين اننا فقدنا الامل فالغابة التلجية دي
لحد ما شفنا نور اصفر
كان شكله كأنه نور كشافات عربية
فالوقت ده ابتدى يرجعلنا الامل مرة تانية 
اننا لقينا حد يوصلنا عالطريق

وقتها سبت رامي قاعد تحت شجرة 
و طلعت اجري ف اتجاه النور باقصى سرعة 
لكن لما مشيت و قربت اكتر 
النور اختفى و مبقاش موجود
و اكتشفت اننا مكناش قريبين مالطريق ولا حاجة
واننا لسه محبوسين ف وسط الجبال
لحد ما لمحت الدخان اللي طالع مالمدخنة بتاعتكم
و جيت وراه علطول
ابني لسه مرمي هناك تحت الشجرة 
احنا لازم نروح عشان نلحقه

وقتها احنا ال ٤ قمنا بسرعة و جبنا المعدات بتاعتنا 
وطلعنا برة الكابينة
مازن سبقنا و طلع يجري على كابينة الحراس
 عشان يجيبلنا دعم
وانا و طارق مشينا ورا الراجل عشان ياخدنا للمكان
اللي ساب ابنه فيه

و بعد حوالي ٢٠ دقيقة 
كنا وصلنا عند الشجرة 
لكن كل اللي لقيناه وقتها 
كانت شنطة الظهر بتاعت رامي

الراجل كان مصدوم انه ملقاش ابنه
ابتدى يصرخ و ينادى عليه بصوت عالى
لكن مكنش فيه اي رد

وقتها انا و طارق ابتدينا ندور فالمنطقة المحيطة
عشان نشوف لو  كان رامي اتحرك هنا او هناك
لكن بسبب تساقط الجليد فالمكان
مقدرناش اننا نلاقي اي اثار اقدام
و كان من الصعب جدا علينا
اننا ندور فالمنطقة لوحدنا

بعدها مازن وصل و كان معاه ٥ حراس
و اللي كانوا متبلغين بالفعل باختفاء رامي
و برغم العاصفة التلجية اللي مكنتش مبينة حاجة
كلنا اتجمعنا مع بعض عشان ندور على رامي
كلنا كنا عارفين قد ايه الموقف كان حرج جدا
خصوصا ان جوزيف كان بلغنا بالفعل 
ان حالة ابنه كانت صعبة جدا لما سابه

بعدها الحراس ابتدوا انهم يجيبوا كلاب حراسة
و فالوقت ده
القصة خدت منعطف تاني خالص غير متوقع

على بعد ١٠٠ متر من الشجرة اللي رامي كان قاعد عندها
كان فيه منحدر كبير
و كنا كلنا ملاحظين وجود شئ فوق المنحدر
لكن بسبب الجليد الكتير 
الشئ ده مكنش واضح
ابتدت الكلاب انها تهوهو بصوت عالي
و هي بتبص عالشئ الموجود فوق المنحدر 
و عشان كده ابتدى ٢ من الحراس انهم يروحوا هناك عشان يشوفوا ايه اللي موجود هناك
لكن وقتها 
اتصدمنا كلنا ماللي شوفناه
الشئ اللي كان موجود
كانت جثة رامي و هو مرمي على وشه فالتلج
لكن مكنش على جسمه اي اصابات تؤدي للموت
لو كان فعلا وقع من عالمنحدر زي ما كلنا خمننا فالأول
كمان رامي كان تعبان جدا و مكنش قادر يتحرك
ف ازاي  قدر انه يقوم و يمشي مسافة ١٠٠ متر لحد المنحدر

بعدها تقرير الطب الشرعي قال ان سبب الوفاة
هو ان رامي اتعرض لجفاف شديد لوقت طويل بسبب درجة الحرارة 
خصوصا ان مكنش معاه اي وسايل حماية

لكن لحد دلوقتي 
لسه فيه شوية أسئلة بخصوص موت رامي
ملهاش اجابة

اولا لو رامي فعلا كان تعبان جدا
ازاي قدر انه يقوم من مكانه و يمشي كل المسافة دي لوحده

ثانيا على افتراض انه مات فعلا بسبب الوقعة
ازاي مفيش اي اصابات ف جسمه

عشان اكون صريح معاكم
احنا سمعنا نظريات كتير حوالين موت رامي
بعضها بيقول ان النور اللي ابوه شافه ده كان مجرد تمويه
عشان القاتل يقدر انه يقتل رامي

البعض التاني بيقول انه كان انتحار
خصوصا ان رامي وقتها كان ف حالة من فقدان الامل 

و البعض بيقول انه مات بسبب هجوم حيوان
لكن رامي جسمه مكنش فيه اي اصابات

كمان فيه البعض اللي سرح بخياله لبعيد و قال 
ان الاب اختلق قصة مش حقيقة
عشان يقتل ابنه 

لكن بالرغم من كل النظريات دي
لسه لحد دلوقتي مش واضح مين ولا ايه الشئ اللي قتل رامي
و عشان كده حيفضل موته لغز مش مفهوم 
للأبد 






اشترك في قناتنا عاليوتيوب

تابعنا على صفحتنا عالفيسبوك

اشترك في جروب الفيسبوك

تابعنا على صفحتنا عالانستاجرام

تابعنا على قناتنا عالتيك توك

تابعنا على صفحتنا على تويتر

أخر المواضيع من قسم : انيميشن رعب

تعليقات

إرسال تعليق