طبيب الأسنان السفاح
الشئ الاكيد
اننا كلنا لما كنا صغيرين
روحنا عند دكتور الاسنان .. ولو ل مرة واحدة عالاقل
مفيش حد مش بيخاف من دكتور الاسنان
كلنا بنعتقد ان دكاترة الاسنان دول مجرمين و ساديين
ناس مخلوقة بس
عشان تأذيك و تعذبك
لكن بمرور الوقت وانت بتكبر
الخوف ده بيبتدأي يقل مع الوقت
و بتبدأ تعرف ان دكاترة الاسنان دول بيعملوا كل اللي يقدروا عليه
عشان يحافظوا على صحة اسنانك
و بيحاولوا باقصى جهدهم
انهم يتاكدوا انك متحسش باي الم
اثناء فترة العلاج
اول مرة روحت لدكتور الاسنان
كنت شاب كبير فالسن
و مكنتش خايف وقتها من فكرة اني اروحله
لأن اسناني كانت كويسة الي حد ما
و مكنش عندي مشاكل خطيرة
لكني مكنتش اعرف وقتها
ان انا مكنتش رايح لدكتور اسنان
انا كنت رايح
ل مجرم و سفاح
القصة بدأت من ٢٠ سنة
فاليوم اللي قررت فيه .. اني اروح لدكتور الاسنان
لاول مرة ف حياتي
فالوقت ده كان عندي ٢٥ سنة
كنت متوتر شوية من فكرة اني اروح
لكن التسوسات اللي كانت ف اسناني
كانت مخوفاني اكتر
لاني كنت عارف اني لو سبتهم اكتر من كده
حيبتدوا يسببولي الم
و بعدها
الالم حيبقى مش محتمل
عشان كده وقتها
حجزت معاد مع الدكتور اللي خطيبتي رشحتهولي
و كنت عارف وقتها ان انا وقعت مع دكتور شاطر
لان الدكتور ده
كان هو اللي بيعالج خطيبتي
و اهلها كلهم
و لحسن الحظ
حجزت معاد قريب جدا عن اللي كنت متوقعه
و فاليوم اللي كنت المفروض اروح فيه
برغم ان محدش فيكم حيصدقني
انا مكنتش خايف .. بالعكس
كنت متحمس جدا
اليوم اللي كنت رايح فيه
خطيبتي كانت المفروض انها تيجي معايا عند الدكتور
لكنها كان وراها شغل كتير فاليوم ده
عشان كده مقدرتش انها تيجي معايا
و اول م وصلت هناك
رنيت جرس العيادة
و بعدها ب ثواني
الباب اتفتح
لكن وقتها
فتحلي راجل طويل و شكله غريب
و بيني و بينكم
حسيت ب خوف كبير اول م شوفته
كان شكله مرعب و بيضحكلي ضحكة غريبة
و كان لابس بالطو ابيض
لكن كان شكله صغير جدا عليه
كانه مش بتاعه
و كان لابس تحتيه هدوم كاجوال
بصراحة
مكنش ده لبس الدكتور
اللي انا كنت متوقعه
لكن وقتها
قررت اني اشيل الافكار المخيفة دي من دماغي
و دخلت جوه العيادة
العيادة كان شكلها نضيف
وكانت كل حاجة مرتبة
لكني كنت متفاجئ
ان مفيش حد فالمكان
خطيبتي كانت قايلالي اني اسلملها على السكرتيرة اللي برة
لكنها اكيد كانت اجازة فاليوم ده
الدكتور : يلا بينا عالاوضة
مفيش عيانين غيرك النهارده ف حنبدأ علطول
انا : تمام بس قبل م نبدأ
كنت عايز اسال حضرتك عالاسعار
عشان اعرف لو ححتاج استخدم الكريدت كارد
الدكتور : مش فاكر الاسعار كانت كام
لما نخلص حبعت رسالة للسكرتيرة
انا : هي مش هنا ! لكن انا خطيبتي كانت قايلالي انه موجودة
الدكتور : ااا مظبوط .. انا مشيتها
انا : تماام .. يلا بينا
الدكتور : اطلع عالكرسي
واول م قعدت عالكرسي
الدكتور قفل باب الاوضة و تربسه
مكنتش فاهم وقتها هو ليه عمل كده
لكني قلت اكيد هو عمل كده
عشان محدش يزعجه اثناء الشغل
الدكتور : خليك ثابت .. دلوقتي حديلك حقنة البنج
انا : لكن انا لسه مقولتلكش ايه اللي عندي
الدكتور : انت مش محتاج تقولي
انا شايف التسوسات هنا من عندي
و من غير ميضيع اي وقت
ابتدى يدخل حقنة ف دراعي
انا : انا كنت فاكر انها حتكون حقنة موضعية ف بقى
مكنتش اعرف انكم بتدوا مخدر للجسم كله
الدكتور : لو سمحت
كفاية اسألة عشان اعرف اركز ف شغلي
متتحركش
انا : حاضر ... اااا انا اسف
بعدها ابتدى يفتح بقى و يبص جواه فوق و تحت
لكنه مداش اي اهتمام للتسوسات اللي عندي
و بصراحة
ده كان مخوفني جدا
يا ترى انا عندي مشاكل تانية ف سناني
وقتها كنت بفكر اني اسأله عن نوع المشاكل اللي عندي
لكني مكنتش عايز اقاطعه فاللي كان بيعمله
او اخليه يفقد تركيزه
بعدها ب ثواني ابتديت احس باحساس غريب
احساس غريب ف كل حتة ف جسمي
حاولت اني احرك ايدي
لكن وقتها مقدرتش
و ابتديت احس ان المخدر اللي ادهولي
ده اكتر مخدر مؤثر موجود فالعيادة
لكن وقتها
حسيت ان فيه حاجة غلط
انا كنت حاسس ب بقى
كنت حاسس ب جسمي كله
لكني مش قادر اتحرك
وقتها حاولت اني اشرح للدكتور اللي انا حاسس بيه
لكن الكلام مكنش بيطلع مني
انا : هو اللي انا حاسس بيه ده طبيعي ؟!
الدكتور :طبعا انت اكيد بتسأل دلوقتي انت ليه مش قادر تتحرك
ده لان الحقنة اللي انا ادتهالك مكنتش مخدر
كانت مادة بتسبب شلل
انا عايزك تفضل ثابت زي منتا
لحد م اخلص الجراحة بتاعتي
الكلام اللي قالهولي خلاني حسيت برعشة
و ابتديت احس ب كهربة ف جسمي كله
مكنش عايزني اتحرك من عالكرسي
ووقتها فعلا مكنتش قادر اتحرك
لكني كنت حاسس ب كل حاجة
الدكتور : لو بتسأل انا ليه مدتلكش مخدر
ده لأني عايزك تفضل حاسس بكل اللي حعمله
انا عايزك تحس بالالم
دي احسن طريقة عشان تاخد بالك من صحتك بعد كده
و بعد م خلص كلامه
ابتدى يكشف على سناني و هو بيدخل ادوات جوه بقى
كان بيعمل نفس الحاجات اللي اي دكتور اسنان بيعملها
لكنه كان بيعملها ب عنف
و ابتديت احس انه مش عارف اللي هو بيعمله
الدكتور : ممم تمام انا كده خلصت كشف
للأسف
سنانك كلها بايظة
اللي مسوس و اللي فيه جير و اللي لونهم اصفر
عشان كده يؤسفني اني اقولك
اني حخلعلك سنانك كلها
و بمجرد ما خلص كلامه
ابتدى يجيب الادوات من عالبنش اللي جمبه
انا : تخلعلي سناني كلها !
ااا اكيد بتهزر مش كده ؟!
لكنه وقتها مردش عليا
و ابتدى يفتح بقي ب عنف و هو بيشد سناني من مكانها
الالم اللي كنت حاسه كان ميتوصفش
الم قوي جدا لدرجة اني كنت حاسس اني حتجنن وانا قاعد ف مكاني
حاولت اني اصرخ
حاولت اني اقوم اجري
حاولت اني اضربه
لكن جسمي مقدرش
الدكتور: معلش اتحمل شوية
انا لازم اشدها بسرعة
كل م كان بسرعة كل م كان احسن
انت عارف
انا اصلا مش دكتور سنان .. عشان اكون صريح معاك
واثناء م كان بيتكلم معايا
كان بيشد السنة التانية بمنتهي العنف
كل اللي كنت قادر اعمله وقتها
اني اعيط من كتر الالم
لاني وقعت تحت ايد شخص مجنون
الدكتور : متفهمنيش غلط
انا طول عمري كان نفسي ابقى دكتور
بس مكنتش بحب المذاكرة
حاولت افهم السكرتيرة اللي كانت موجودة هنا الكلام ده
لكنها مبتفهمش
عشان كده قتلتها
و بعد الاعتراف اللي اعترفهولي
ابتدى يبصلي بصة مرعبة
و هو بينقل عالسنة اللي بعدها
كنت بالعافية قادر اني اسمعه
لان جزء مني كان ابتدي بالفعل
انه يفقد الوعي
و الجزء التاني
كان بيحاول انه يفضل فايق
عشان مموتش هنا
الدكتور : هي هنا على فكرة لو حابب تقابلها
مرمية جمب الدكتور فالاوضة اللي جوه
لو حابب
ممكن اوديك عندهم
ساعتها ممكن اجبلكوا اوضة تانية اكبر
بس تعرف
شكلك حلو اوي و انت بيغمي عليك
ححاول احسسك ب شوية الم كمان
قبل متموت
و فعلا
ابتدى انه يشد اكتر من سنة ف نفس الوقت
كان بيخلعهم بمنتهي العنف
عشان يعذبني اكتر و اكتر
لدرجة ان فيه اسنان كتير اتكسرت جوه بقى
و فضلت الجدور بتاعتها موجودة
الالم كان صعب جدا لدرجة اني بالفعل ابتديت ادوخ
و كنت مستعد للموت
وكل ده كان بسبب
اني حاولت اروح لدكتور اسنان
عشان اصلح سناني
بعدها ابتديت افقد الاحساس
مكنتش حاسس بأي الم
و ابتديت اشوف نور ابيض و اسمع صوت صفارة ف ودني
عينيا ابتدت تقفل اكتر و اكتر
و كنت بفقد الوعي بالتدريج
لكن قبل مقفل عيني
شفت شخص كان واقف ورا الدكتور المزيف
كان لابس لبس ظابط
و كان موجه مسدس نحية المجرم ده
الدكتور السفاح كان واقف مبيتحركش
لكن فجاة
سحب مقص كبير و ابتدى يرفعه نحيتي عشان يقتلني
لكن قبل مقفل عيني للمرة الاخيرة
شفت نور بيخرج مالمسدس
و بعدها
محستش ب اي حاجة
و لما فقت بعدها ب كام يوم
شفت خطيبتي كانت واقفة قدامي و بتعيط
كنت محجوز ف مستشفى
و كنت حاسس بدوخة و مش فاهم ايه اللي حصل
لكن كنت حاسس بالم رهيب ف بقى كله
ابتدت خطيبتي انها تشرحلي اللي كانت تعرفه
و بعدها الدكاترة اللي فالمستشفى و ظباط الشرطة
فهموني كل حاجة
الراجل اللي انا قابلته ده مكنش هو دكتور الاسنان
هو كان جي المكان عشان يقدم على وظيفة
و مكنش عنده اي خبرة ف اي مجال
و كان باين من منظره اللي شافوه فالكاميرا
انه شكله مجنون
بعدها قتل السكرتيرة و الدكتور بدم بارد
و شال الجثث فالاوضة اللي جوه
و بعدها
ابتدى ينضف المكان من اثار الدم
و لبس البالطو
و ادعي ان هو الدكتور
لكن لحسن الحظ
بعض الجيران شافوا الجثث و هي مرمية ف اوضة مكشوفة
و علطول اتصلوا بالبوليس
و بعدها
الشرطة كانت وصلت علطول للمكان
ولو ده مكنش حصل
مكنش زماني عايش لحد النهارده
عشان احكلوا القصة
و بعد الحادثة دي
جريت علطول و روحت مستشفى كبيرة
و الدكتور هناك بلغني اني نجيت الليلة دي باعجوبة
لاني فقدت اسنان كتير .. و معاها
فقدت دم اكتر
و كان لازم عشان اقدر اعوض الاسنان دي
انهم يشيلوا كل الاسنان المتكسرة اللي لسه موجودة
و يركبولي اسنان صناعية
و لحسن الحظ
اني بقيت متعود عليهم دلوقتي
و مبقتش محتاج اني اروح لدكتور اسنان مرة تانية
لكن من ساعة اليوم ده
بقيت بخاف من كل الدكاترة
مين عارف
لو ف يوم فكرت اني اروح اكشف عند دكتور
ايه اللي يضمنلي اني مقعش تاني المرادي تحت ايد سفاح
و المرادي يحاول انه يخرج
قلبي من مكانه
اشترك في قناتنا عاليوتيوب
تابعنا على صفحتنا عالفيسبوك
اشترك في جروب الفيسبوك
تابعنا على صفحتنا عالانستاجرام
تابعنا على قناتنا عالتيك توك
تابعنا على صفحتنا على تويتر
تعليقات
إرسال تعليق