سفاح البرجر
قبل م ابدأ معاكوا القصة ..
خلينا نكون متفقين ان مفيش اي وظيفه سهلة
لكن وظيفة خدمه العملاء بالتحديد .. هي وظيفة
من اصعب الوظائف اللي انت ممكن تشتغلها
وبسبب كوني كنت بشتغل موظف في ماكدونالدز لمدة حوالي ٥ سنين
تقدروا تقولوا اني تقريبا .. قابلت كل انواع العملاء
واللي كان اغلبهم .. ناس بياخدوا وقت طويل جدا
عشان يطلبوا الاوردر بتاعهم
وناس تانيين كانوا بيتعصبوا ويغضبوا
لاسباب تافهه وبسيطه
والشئ المطلوب منك وسط كل ده
هو انك تعرف تتعامل كويس .. مع كل الانواع دي
من اول يوم ليا هنا في المكان
كنت ابتديت بالفعل اني اتعلم ازاي اقدر اتعامل
مع كل انواع العملاء
لكن الشيء الوحيد اللي متعلمتوش
هو اني ازاي اقدر اتعامل في الموقف المرعب
اللي اتحطيت فيه في اليوم ده ..
الحادثة دي حصلتلي من حوالي ٣ سنين
كان يوم السبت بعد الظهر .. وتحديدا
كان مع بدايه الشيفت بتاعي
وفي اليوم ده بالأخص .. كان مطلوب مني
اني اقف عند شباك الطلبات
اليوم كان ماشي كويس جدا في الاول
برغم اني كنت ابتديت احس بالملل
بسبب بطء العملاء في طلب اوردراتهم
و ده كان لحد ما سمعت صوت محدد .. لفت انتباهي
انا : مساء الخير يا فندم ..حضرتك تحب تطلب ايه ؟
الراجل : عايز ثلاث سندوتشات برجر كبير
انا : تمام .. حضرتك تحب اي نوع برجر ؟
الراجل : مش حتفرق .. هاتلي بس برجر
الراجل كان باين عليه انه مضايق جدا من سؤالي
كان من الواضح عليه انه كان جعان
ومستنى البرجر بتاعه بأي شكل
انا : تمام يا فندم .. ايه رأي حضرتك ف ٣ ساندويتشات بيج ماك ؟!
الراجل : اا تمام أوي .. يلا بسرعة
انا : تحبهم بيج ماك كومبو ؟!
الراجل : لأ .. انا قلت عايز برجر و خلاص
انا محتاجه
و ف نفس اللحظة
كل زمايلي اللي كانوا موجودين
ابتدوا يضحكوا بسبب طريقة الراجل الغريبة
لكن على عكسهم تماما
انا كنت حاسس بشئ مش مريح
لكنى وقتها محاولتش ابين للراجل
القلق اللي كان ظاهر على وشي
الراجل كان قصير .. و كان مليان نسبيا
لكن منظره ككل .. كان مقرف جدا بصراحة
وشه كله كان متغطي بالصوص و الكاتشب
و شعره كان طويل و بيلمع بطريقة غريبة
لدرجة انه كان بيمضغ شعره ب سنانه
كنت شايف قد ايه هدومه كانت مقطعة
لدرجة ان فيه اجزاء كتير .. كانت ظاهرة من جسمه
و بمجرد م فتح شباك العربية
ابتديت اشم ريحة فظيعة جدا .. كانت حتخليني ادوخ
لدرجة اني حسيت انه ممكن يتحرج من ردة فعلي
لكن على العكس تماما
الراجل مهتمش ب كل ده .. و ابتدى يقولي
الراجل : خد فلوسك .. و اديني الأكل
انا : بس كده حضرتك دافع فلوس زيادة يا فندم
الراجل : اديني الأكل بتاعي
انا : اه .. انا اسف يا فندم .. اتفضل
و بمجرد م سلمتله الاوردر
ابتدى الراجل انه ياكل السندوتشات بطريقة وحشية جد
لدرجة انه حتى مشلش الورق اللي كان موجود عليها
ووقتها بصراحة .. جزء مني كان بيقولي اني اتجاهله
لكن ف نفس الوقت
فضلت متسمر ف مكاني
وانا شايفه و هو ماسك البرجر بالطريقة البشعة دي
و بياكل ساندوتش ورا التاني بسرعة جنونية
انا : هو ممكن حضرتك تتحرك تاكل ف مكان تاني ؟!
لأن ممكن عربية تانية تيجي تطلب
لكنه وقتها
اتجاهل كلامي تماما .. و فضل مكمل اكل ب نفس الطريقة المقرفة
انا : يا فندم .. اانا بكلم حضرتك
ممكن حضرتك تتحرك بالعربية من هنا؟!
ولما حسيت ان مفيش اي فايدة من كلامي
اتجهت علطول لمكتب المدير بتاعي..وحكتله اللي حصل
ووقتها بلغني بغياب حارس الامن فاليوم ده
و طلب مني اني اخرج انا و حد من زمايلي
عشان نمشي الراجل ده من برة
بصراحة و مكدبش عليكم
انا كنت متردد جدا وقتها
لكن ف نفس الوقت
المدير بتاعي كان شخص عنيف و متسلط جدا
عشان كده وقتها .. مكنش قدامي اي حل تاني
و بعدها علطول
كنت بالفعل طلبت من اتنين من زمايلي انهم يجوا معايا
وابتدينا نتحرك علطول للباب الأمامي
زميلي : ياااه .. اخيرا حننول شرف اننا نقابل سفاح البرجر
انا : قصدك ايه ؟!
انت شوفته قبل كده ؟!
زميلي التاني : كل اللي شغالين ف شيفت بليل عارفينه
المجنون ده بيجي كل يوم و يفضل قاعد فالعربية لحد م يخلص كل الساندوتشات .. و بعدها يمشي علطول
زميلي : واضح انه جاع بدري النهارده
انا : هو خطر طيب ؟!
اصله بصراحه شكله مخيف جدا
زميلي التاني : لا خالص .. متخفش منه مش مؤذي
لكننا بمجرد م خرجنا برة
مقدرتش حتى اني اخبطله عالعربية
لأن وقتها .. كان الراجل اختفى
انا : اعتقد انت قلتلي انه بيمشى بعد م يخلص اكل
لكن مقلتليش انه بيسيب العربية هنا
زميلي : واضح انه كان مستعجل النهارده
بعدها ابتدينا نبص جوه شبابيك العربية بتاعته
لكن مكنش فيه اي اثر للراجل ده
و بعدها
رجعت تاني على مكتب المدير
واللي بلغني وقتها بأن هو اللي حيتصرف فالموضوع ده
ووقتها اعتقدت
انه اكيد حيبعت عربية عشان تسحب عربية الشخص ده
لكن الحقيقة
ان انا مكنتش مهتم اصلا ب كل ده
لأن كل اللي انا كنت بفكر فيه وقتها
ان انا متعاملش مع المعتوه ده مرة تانية
بعدها ابتديت اتحرك مرة تانية ف طريقي ل شباك الطلبات
لكني فالطريق
سمعت صوت حاجة لفتت انتباهي
كانت اصوات غريبة جدا جاية من غرفة التخزين
و كان كأنه صوت خارج من حيوان و هو بياكل
عشان كده وقتها .. و بدافع الفضول
اتحركت علطول ل جوه الاوضة
لكن اللي شوفته قدامي وقتها
سببلي رعشة ف جسمي كله
الراجل المجنون ده كان موجود ورا الباب
كان نايم عالارض و هو قالع التيشيرت بتاعه
و كان قاعد بياكل شرايح برجر نية مش مطبوخة
و بمجرد م شوفت منظره المقرف
حسيت وقتها اني عاوز ارجع
المجنون ده كان ماسك ف ايده اربع شرايح برجر مع بعض .. و بياكلهم كلهم ف نفس الوقت
لدرجة ان اللحم الني اتجمع كله ف ايده كانه كتله واحدة .. و علطول .. حطها كلها ف بقه
و بسبب منظره المقزز اللي كنت شايفه قدامي
مقدرتش بصراحة وقتها .. اني اتحمل اكتر من كده
وعلطول ابتديت ارجع .. ووقعت على ركبي عالارض
لكني بمجرد م ابتديت افوق و ارفع دماغي مرة تانية
الشخص المجنون ده كان واقف قدامي بيبصلي
وكان باين عليه انه متفاجئ من وجودي فالاوضة كل ده
الراجل المجنون : انت جي تاكل زيي ؟!
مكنتش قادر وقتها اني ارد عليه
لأني كنت لسه بترعش .. بسبب المنظر اللي انا شوفته
و بمجرد م حاولت اني اقوم اقف
الراجل زقني جامد عالارض
و نط بسرعة قعد على صدري
انا : انت ايه اللي انت بتعمله ده ؟!
ابعد عني
و من غير م يرد عليا
ابتدى المجنون ده انه يبتسم اكتر ابتسامة مرعبة و شيطانية .. انا شوفتها ف حياتي
و بعدها
ابتدى يوريني ايده .. و اللي كانت مليانة لحم برجر ني
انا : انت بتعمل ايه !
بقولك ابعد عني ..
الراجل المجنون : متخفش .. انا شيلتلك شوية
و بمجرد م خلص كلامه
ابتدى انه يحشر ايده اللي مليانة برجر ني جوه بقى
لدرجة اني كنت بتخنق حرفيا
و حاولت بسرعة اني احرك ايديا الاتنين
ف محاولة يائسة اني اضربه عشان اخرج الاكل ده كله من بقي
حاولت اني اعمل اي شئ يخرجني مالموقف اللي كنت فيه
لحد م بعدها
ابتدى الشخص المجنون ده انه يقرب مني اكتر
وابتدى يعضني من وشي
كأني شريحة من شرايح البرجر الني اللي كان بياكلهم
وقتها حاولت اني اضربه بايدي ف وشه
لكنه متأثرش .. و فضل مستمر ف انه يضغط على وشي بأسنانه الحادة
لدرجة اني ابتديت احس .. اني بموت بالفعل
السفاح المجنون ده كان حياكلني حي
وانا حتى معرفش ليه .. ولا ايه السبب !
لحد م فجأة
سمعت صوت صرخة عالية جاية من ورايا
و ف نفس اللحظة
السفاح ده ابتدى انه يقوم و يبعد عني
واول م بصيت ل فوق
شوفت واحد من زمايلي واقف و هو خايف و مرعوب
و ف ايده عصاية خشب كبيرة
كان باين عليها انها مكسورة مالنص
بعد م ضرب بيها السفاح المجنون ده
لكن بعدها علطول ب ثواني
السفاح ابتدى يفوق مالضربة
و ابتدى انه يتحرك نحيتي مرة تانية
لكن المرادي
زميلي كان شالني من عالارض و سحبني علطول ل برة الاوضة .. و قفل الباب وراه
زميلي : حد يساعدنا يا جماعة .. كريم مصاب
كريم .. هو ده نفس الراجل بتاع البرجر ؟!
انت كويس طيب ؟!
و من غير م اجاوبه
ابتديت اتف كل البرجر الني اللي كان موجود جوه بقى
و قدرت باعجوبة .. اني اتنفس مرة تاني
و ف خلال ثواني
كان كل زمايلي فالشغل موجودين
و كانوا بيحاولوا انهم يعالجوا الجروح اللي ف وشي لحد م توصل عربية الاسعاف
بعدها حاولت اني اسند نفسي واقف على رجلي
لكن ف نفس اللحظة
لاحظت ان كل زمايلي فالشغل
كانوا واقفين بيبصوا على شباك اوضة التخزين مرة تانية
انا : فيه ايه .. انتوا واقفين كده ليه ؟!
زميلي : كريم .. متبصش وراك
لكن وقتها
الفضول اخدني مرة تانية .. و بصيت ورايا
ووقتها
شوفت السفاح المجنون ده
و هو واقف جوه الأوضة .. و بياكل نفس البرجر الني ده مرة تانية
لكن الاختلاف الوحيد المرادي
انه كان لافف شرايح برجر كتيرة جدا حوالين جسمه
واثناء م كان واقف بياكل
كان بيبص لكل اللي واقفين بصة غريبة و مرعبة
بصة كأنه شايف انهم عاوزين يسرقوا منه شرايح البرجر اللي كان بياكلها
و بعدها علطول ب دقايق
كانت الشرطة وصلت
وقدروا بالفعل .. انهم يقبضوا عالشخص المجنون ده
واللي كان بيتصرف وقتها .. كأنه حيوان متوحش
مش مجرد انسان
وبعد الحادثة دي ب فترة
رجعت مرة تانية للشغل فالمطعم
لكني مقدرتش اكمل كتير هناك
وسبته بعدها ب فترة مش كبيرة
لأن ف كل مرة كنت بشوف فيها شرايح البرجر
كنت بفتكر الحادثة المرعبة اللي حصلتلي
وخلال الفترة الصغيرة اللي قعدتها هناك قبل ممشي
سمعت اشاعات كتيرة بخصوص الراجل المجنون ده
بعضها كان بيقول ان الراجل ده كان شخص وحيد و هادي .. لكنه بسبب ظروف مش معروفة
اتحول وبقى مجرم عنيف مع الوقت
والبعض التاني كان بيقول
انه من اكلي لحوم البشر
و بسبب طقوس شيطانية هو مؤمن بيها
كان مطلوب منه انه ياكل لحوم بشر .. أو اي لحم ني
لكن الحقيقة الوحيدة فالقصة
هي اني مكنتش مهتم اصلا اني اسمع اي تفسير .. بخصوص السفاح المجنون ده
كان كفاية عليا اني ف كل مرة ببص فيها ل نفسي فالمراية
كنت بشوف اثار الجروح و العلامات اللي السفاح المجرم ده
سابها على وشي ل بقية حياتي ...
تعليقات
إرسال تعليق